Yynestäche – ummeschloo,
duurezieh und aabeloo!
Sie maine sicher, s’kunnt e Striggedde-Värs,
also bitte – sytt wenn sinn mir so pervärs?
Mir wänn sie nit lenger uff d’Foltere spanne,
dasch dr Schlachtruef vo de Thuner Fuessballmanne!

An dr EM gitt’s numme Carlsbärg-Piss,
mir finde das e schuurige Bschiss.
A propos Bschiss – do leggsch nundefahne,
au no 2 Stutz zem Saichen aane!
Jetzt dien mir aifach, ohni z’blinzle,
wie friehner - ane Huuswand brinzle!

Schoofseggel fiehrt in dr Regel zue Klaage,
Schoofsuuri duet  am Image gnaage,
fir Schoofhirni gumpt dr ain an Graage,
bi Schoofskopf griegsch e Schutt in Maage!
Es duet uns laid – mir saages do inn,
fir dä Double-You Bush kunnt ys nyt besser’s in Sinn!

D’Frau vom Schoofbogg hett’s gstöggelet,
will dä immer saumässig böggelet!
Drum schiggt’s en ins Wellness no Hailigebrugg,
vo dert kunnt er miteme Kurschatte zrugg!
„Wenn ych jo gwisst hätt, wie das lauft,
hättem gscheiter e Saifi kauft“!

S’froggt e Schoof en anders am Disch,
wär äggscht dä Guy Morin isch.
Äs haig vo däm no nie ebbis gheert,
är heb jo schliesslig no nie ebber gsteert!
Do hänn sy vernoo vom en andere Schoof,
dä syg halt s’ganz Johr im Winterschloof!

Mir hänn do letschti mit unsere Junge
bim Ali e Döner Schööfig’s verschlunge.
Drnoo simmer mitem Combino-Schlitte
furzend wieder haimwärts gritte!
Do schreit dr Waagefiehrer Haas
„koscht e Lappe – wäge z’vyyl Dryybhuus-Gas“!

Zem Gaissbogg kemme no Schoof derzue,
vorgseeh isch als näggscht’s none Kueh.
In dr Zwischezytt – minus ai Stier,
Büffel hingeege hett’s no vier!
E Hampfele Hiehner hänn sy au,
und e Mörgeli – wo sich benimmt wiene Sau!

Dass d’Roche dä Durm will unden am Rhy,
das gsehn mir aigentlig nit yy!
E Dänggmool fir d’Gigi Oeri baue
isch iberflissig – me froggt im Verdraue,
fir was bruucht die – nur so zem Praahle
in ihrem Alter – e Spiraale?

So SMS-Kirzel simmer au go lehre,
und hänn uns zer Varianten „X“ lo bekehre!
Ai „X“ haisst jo „Kuss“, das macht uns perplex,
zwai „X“ haisst „schmuuse“, bi drei „X“ mainsch „Sex“!
Mir hänn’s probiert, und Vier „X“ aanebiige,
aber wisse nit, muesch drbyy stoh oder liige!

Zem demonstriere ryttet dr Heiri vo Buus
uff sym Schööfli z’mitts vor’s Bundeshuus.
Das boggt – hett dr Heiri an’d Muure spediert,
denn hänn’s en grad no zwangspensioniert!
Wenn’s so funktioniert, denn sott me draa dängge,
das boggige Schoof em Couchepin z’schängge!

Scho 60 Johr – s’Bethli darf z’friide syy,
lauft dr Prinz wiene Schööfli hindedryy!
Dass är s’Fremdgooh nit ka loo
kenne mir ganz guet verstooh.
Sy Sexappeal lauft uss de Fuege,
will er numme darf ans Fuudi luege!

Hilfe – dr Szabo duet nit rächt,
und s’wältlige Gricht isch au nit gerächt!
S’schwarze Schoof, dr Koch, dä Gnoom
suecht Byystand bi sim Babbe in Rom!
S’wurd grad no fähle, als Buess in dr Noot,
s’befiihlt uns e Schwoob – wo’s duure gooht!

Unser Schööfli haig Fraid, so hänn mir dänggt,
Und hänn ihm e Päärli Schlittschueh gschänggt!
Kuum uffem Yys, do fliegt’s zagg-zagg
ganz himmeldruurig uffe Sagg!
Zäh Minute isch es liige bliibe,
denn hett’s bim EHC underschriibe!