Grieg und Hunger uff der Wält, Sii, es isch schlimm
Und dass das Klima sich erhoolt - mer glaube s nimm.
Dier und Mensche wäärde blogt, doch am maischte duet is wee
Dass es bald emool kai Glepfer me wiird gee.

Au dr glaini Knut, dr häärzigscht Bäär uf Äärde
Wiird mool e grosse, digge, beese Yysbäär wäärde
Das isch dr Lauff vo dr Naduur – wenn me do wyter dänggt, jä Sii
Isch woorschynts au dr Bush als Buschi häärzig gsii.

S goot nimm lang, no deents in jedre Baiz esoo:
„Dääte Sii mit Irer Ziigi usegoo!“
Wenn mir denn alli dusse steen, denn isch es letschtemänd no guet
Dass sich s Klima immer mee erweerme duet.

Mir Baasler sinn do in dr Schwyz  jo aarmi Sieche
S het is niemer gäärn, scho gaar nit die us Rieche
Mir sinn verschupft, am Rand, doch d Wisseschaft macht uns e Kumplimänt:
Dass mir z Baasel do die diggschte Kinder händ.

S Meeriaa Yyseli, das foot jetz schwäär aa spaare
Bisch nit erschtglass, liggsch im Freie uff dr Baare
Damit d Lyt nimm so lang blyybe und au wäg dr Ustrittsquote
Leen si sich jetz vo dr Dignitas biroote.

D Carla Bruni, die maag Männer an dr Macht
Drum schlyycht dä glai Napoleon zu iire – znacht
Es wääri s eerschte Mool, falls si em wirgglig s Jowoort setti gää
As s Schneewittli wuurd ain vo de Zwäärge nää.

Es git Pilote wo als Bruchpilote stäärbe
Und Bruchpilote wo fir sich als Helde wäärbe
Si sitze alles us, au wenn si nie mee kenne duurestarte
Und wie dr Ospel uff dr goldig Fallschirm waarte.

Zem e Zaiche setze, wil dr Pfuus wiird gnapp
Stelle mir fir fimf Minute d Liechter ab.
Mir wuurde d Rächnig zaale, wenn au nur fir fimf Minute do
Im Maurer syner Biire wuurd e Liecht ufgoo.

De gheersch vo Rieche bis ins Gellert Pändler flueche
Wil si vergääbe iiri wysse Parkblätz sueche
Doch d Regierig ka do nyt derfiir, wenn die noch Parkblätz frooge
Die wysse Linie het sich d Hinggis yynezooge.

Bisch geeg dr Bush, denn duesch McDonalds boykottiere
Als frumme Moslem kasch e Schungge nit goutiere
Als brave Bebbi waisch, dass mir kai Ziiri-Gschnätzlets ässe sotte
Bisch in dr SVP – isch s Bindnerflaisch verbotte.

Goot s um Bierlaiff, sinn die maischte Lyt dergeege
Derbyy kasch froo syy, wenn sich Jungi no biweege
Me rauft sich d Hoor, au bim Stadtmarketing, denn wie ergläärsch däm Huffe
Dass si daas Joor numme Carlsberg deerfe suffe.

Am 12. Dezämber hänn mir s uns gmietlig gmacht
Hänn uns e saumäässig fein Menu kocht zem Znacht
Als Vorspyys Laggs, zem Desseer Schoggimues und dernoo do hämmer
E DVD gluegt, nämlig „Das Schweigen der Lämmer“.

Sinn au Sii am Aarbedsblatz moleschtiert woorde
Es isch e haiggel Thema, das macht vyylne Soorge
Au d SBB die het e Aarbedsgruppe, die sitzt in dr Patsche
Wil alli immer so dä Touchscreen dien betatsche.

De kasch im Museum Faarbe go bestuune
Dr Maurer dä gseet root: „Jä wo blyybe mir Bruune?“
S Museum blybt politisch, in dr Diefsee-Schau, so gheert me do
Goot s nit um Laufe, nai - um s SVP-Niveau.

Bim Speed-Dating mues me ganz schnäll uusefinde
Eb me sich do mit em andre ka befrinde
Miir Schwyzer sinn jo nit so schnäll, es goot – das isch laider woor
Im Bundesroot e Speed-Dating ganzi vier Joor.