Eins Nüünzig koschtet bi mir e Fahrt übere Rhyy
die Maischte gänn zwai Stutz und saage, dr Räscht isch dyy
sogar dr Herr Ospel hett sich so e Fahrt nit loo näh
mi hett äär duurt, y ha ihm das Zäänerli uusegää

Do isch e Häärde wyssy Schoof – und ai Schwarzes isch doo
die Wysse seggle aane – das Schwarze blibbt schtoh
das schwarze Schoof duet ab de Wysse sich eggle
denn die wysse Schoof wänn nur zu dääne wysse Schoof seggle

Do isch e Häärde wyssy Schoof – und e baar Schwarzi sinn do
vermuetlig hett das Schwarze d’Familie lo koo
die schwarze Schööfli han y spööter im Zolli gseh
Sie, dört isch gstande: Ne rien donner, s.v.p.

Im „Baslerstab“ hany glääse , was y im „News“ scho gseh haa
und im „Heute“ und im „20 Minute“ und im „Punggt.ch“
jetzt muess y numme – und bi fascht scho am dööse
vo jeedere Zytyg s’Sudoku no lööse

Wo dr Piero Ex-Terrore im fünfte Gang
grüschvoll z’stoh kunnt im Bligg-Empfang
do hett är sälber gsait und gstöönt
so guet han y glaub scho lang nümm döönt

Dr Sämi Schmid, das macht nit jeede
bemieht sich amme, Hoochdütsch z’reede
dr haiggli Punggt isch doo derbyy
zum das verschtoh muesch Bäärner syy

An Parteidaag vo dr SVP isch Gott sei Dangg
d’Striggede gange als Schnitzelbangg
sie hänn kaini spezielle Väärs miesse mache
s’isch jo doch dr Blocher, wo sait, wenn lache

Nur ai Mool e bitz trieblich uriniere
duet dr Martina d’Karriere ruiniere
das isch doch kai Doping, hett sie gsait zu däm Teschter
für mi isch das höggschtens Schnee vo geschter

Die Lütt vo Dignitas dien, wenn sie schaffe
was dr Tood überseh hett, no zämmeraffe
und wenn sie frei hänn, ych ha das gseh
luege sie gärn no e Match vom EHC

Die Nationalrootskandidate hänn alles riskiert
und hänn mehr als halber blutt posiert
jä, bi mir hett daas gwirggt, wie’s halt so lauft
ych haa neui Unterhoose kauft

Im Autofaare bin y nit grad e Hirsch
zum parkiere nimm y vorhäär e rächte Schlugg Kirsch
das isch gar nümm verbotte, denn döört wo mir wohne
isch sowieso alles blaui Zoone

Sie hänn d’Anna Göldin, doo bisch perpläx
rekapituliert oder soo, die böösi Häx
doo sait dr Sabo, wo mit em Koch duet ringe
so wytt wie die wett y’s au gäärn bringe

Anstatt uff d’Balle und mänggmool e Schutt draa
konzentriert sich Thun uff’s Kamasutra
die kenne jetz alli Erotik-Arte
und griege derfüür e rooti Karte

Ych haa dr Ospel gseh, ganz frisch und froh
ins Hotel Drey Köönig yynegoh
ych gang jetz au und mach döört Drugg
das Zäänerli wott y wieder zrugg