Melodie: Zoge am Boge de Landamme tanzäd  …
 
Zooge-n-am Booge, d Fan-Meile loggt,
lueg wäär deerte-n-alles ummehoggt.
Mängge-n-isch voll, e Huffe sinn bekifft,
und dr Räscht het an e Huuswand aanegschifft.

Jüpelidü und Zötteli dra
Nur immer scheen de Wände na.

Melodie: Siibe kuugelerundi Söi ...
 
Dr Waagefiehrer Haiggi Hayer
rysst e Vollstopp mit sym Zwaier
und rennt uff s Hyysli, kaasch nur hoffe,
äär het kai Basler-Wasser gsoffe.

Melodie: Drei Chinesen mit dem Kontrabass …

Si hänn vo Peking schynts e ghaime-n-Uffdraag iberkoo.
Si sotte kontrolliere, und voor Angscht hänn alli gschwitzt,
eb uff dr Himalaya-Bahn dr Dalai Lama sitzt.

Melodie: Griess Gott Bääseli …

Kaasch d Händ no lang in Unschuld wäsche,
de bisch und blybsch e Plaudertäsche.
Schneewyss wäscht, verooted si iihne,
e Priise Koks in ere Zuuger-Wöschmaschiine

Melodie: Baselbieterlied …

Die Baselbieter Lütli
sinn gaar e bsund’re Schlaag.
Si schaffe und si wärche
z Nacht lieber wie am Daag.
Wenn d Lääde z Baasel schliesse
foot s Gschäft by iihne aa.
Denn kaasch s neij Harry-Potter-Buech
als Kiirchegsangbuech haa.

Melodie: Auf de schwäb’sche Eisebahne …

Auf de schwäb’sche Eisebahne
isch bym Straik kai Zuug meeh gfaahre.
Soo hänn d Schwoobe doch no tscheggt,
dass die Regierig nyt bewegt.

Melodie: Dr Seppel …

Dr Seppel, dr Seppel, dr Seppel isch e Maa.
Dr Seppel isch e brave Maa, dää zündet doch kai Zumfhuus aa.
Dr Seppel, e Ziircher, isch sofort aane grennt,
äär frait sich, dass dää kaibe Böög scho s zwaitmool brennt.

Melodie: Dr Heiri het e Kalb verkauft / für alli andere schynt d Sunne …
 
D Frau Diener daarf in Ständeroot,
well s d Ziircher tscheggt hänn, wenn au spoot.
Dr Muurer stoht am Bellevueblatz
und jault deert wie-n-e granggi Katz.

Fir alli andere schynt d Sunne,
miir mag halt niemerts ebbis gunne,
miir mag halt niemerts ebbis gunne,
niemerts ebbis gunne, niemerts ebbis gunne.

Melodie: Glory, glory, halleluja …

Dr Bush sait zer Frau Merkel: Hello Angie, I agree,
we need less CO2 but ainewääg more Energie.
Doo strahlt en d Angie, wie-n-e digge Maiekääfer aa:
You can my Muesliriegel haa.

Dr Teaser-Rap

Im Keckeis - Army - Schungge  stooht,
me wehri sich in grosser Noot,
by interstellare Aagriffswälle,
wenn alli Kiircheglogge schälle,
mit däm dolle Laser-Phaser.
Sogaar der Blocher losst mit Teaser,
sich geili 1000 Volt uffbrenne,
me däät en sythäär nimme kenne!

Melodie: I ha-n-e Träne in de Auge …

Miir hänn e Drääne in de Auge.
Si hänn dää Blocher nimme gwäählt.
Mit dääre Drääne in de Auge verkinde miir,
daas äär uns au nit fäählt.

Melodie: I be de Schacher Seppeli …

Y bii dr Blatter Seppeli,
im ganze Land bekannt.
Bii friehner s flottischt Bürschtli gsii,
hüt bii-n-y e Vagant.
Muess luege, dass my FIFA macht,
waas ich befoohle haa
und lääbt d Verwandtschaft guet dervoo,
gooht Eych daas gaar nyt aa.