Dr Baschta Müller vom VPOD,
duet sich gärn wytt vorne gsee.
Wägem roote Kittel maint dää Maa,
är mies iiberall dr Latz dinn haa

S ganze Dorf in Röschänz lacht,
woo dr Bischoff Koch zwaite macht.
Dr Sabo blybt dr Chef deert oobe,
und muess nit zrugg zue de Schwoobe.

Entschuldige si my Haltig, y haa s im Rugge,
nit chronisch s’ kunnt vom viile Bugge.
Doo han y no e verstuuchte Duume,
y bii im Blocher go hälfe s Büro ruume.

Dr EHC y has gsee koo,
muess d Nati-A scho glyy verloo.
Ai Matsch nonem andre goot verloore,
zem Gligg isch no kain uff em Yys verfroore.

Me kennt  s’Resultat vo de Pfahlbauer,
s’ het  maistens grägnet voller Power.
No vier Wuche het me doch entdeggt,
d Lyt  hänn glyych, wie d’Gaisse gschmeggt.

D SVP het  zuegleggt d SP verloore,
die Griene sinn wie ney geboore.
Zue de Griene haa-ni nit e so s’Vertraue,
si hänn halt aifach, kaini nätte Fraue.

Im Läggerlihuus gits bald e Aktion,
me ka Läggerli bstelle am Delifoon.
Dr Huusliiferdienscht sott beschtens klappe,
es bringt si uff em Velo, em Mirjam si Babbe.

Hochdytsch scho im Kindergarte,
isch besser so, als no lang warte.
Ich glaube es wird besser gehen,
weil si einander dann verstehen.

I hät fir dr FC-Thun e Prachtsyydee,
e bitz Soda, statt Zugger in Pausetee.
So bruche si, es isch kai Witz,
zem Brinzle nur dr Hooseschlitz.

Dr Ospel isch glaub nimm lang Boss,
no fallt äär vo sym hooche Ross.
Das gscheet em rächt naime duure,
fir joorelangi groossi Schnuurre.