Wie jeedes Joor duen ych hitte doo -
fir Eich e baar Väärsli uuseloo.
Doch - dasch kai Waahlveraastaltig wo’s e Bangg aanegriegt,
ass wäegen iim sogar ain us em Bundersroot fliegt!

Kennte Sii bitti vo iirem Stuel uffstoo
und drunter luege eb Si dert nid noo,
bevoor si alli bachab verschwinde -
e baar Milliarde vom Ospel finde!

Die nei Bundesroots-Fotti het eppis „begnaggt’s,“
si gseet fascht so uus - wie Höörnli mit Ghaggt’s,
do frogsch di, was uns denn die Siiebe no nütze,
wenn si nid emool kennen e Glepfer beschütze!

Em Tooni Brunner sy Kopf – dasch numme d Umhüllig,
und drin inne isch s Hirni vom Blocher als Füllig.
Vergääbet’s wär’s Dyschle,
au wemme dr Blocher däät schmingge,
wel, dr Fisch dä foot immer vom Kopf här aa stingge!

50 Gsichts-Schutz-Maske – maint d EU z Brüssel,
bruuchts geege d Voogel-Grippe pro Monet und Rüssel.
Die länge miir aaber numme halb so lang,
wel ich ammigs in d Ferien uff Neapel gang!

Jetz griegt d Schwyzerfaane e nei Format,
S Gryz änderet, doch d Faane blybt e Quadrat.
Die rooti Flächi wird glainer wäge weeniger Lingge
und fir d Farb nimmt men als Voorlag em Couchepin sy Zingge!

D Hillary Clinton und dr Barack Obama,
keie sich geegesytig iire Drägg ans Pijama,
vo dääne baiden isch aaber kainen e Fääger,
He joo, zeerscht isch är und jetz isch sii dr Nääger!

D Schiinaazi-Daame gseesch wie halbi Lyyche
und wie uff Sarg-Brätter dr Hang aabeschlyyche.
S wär Zyt ass me die Daame in s Fuudi däät pfätze,
ass si äntlig so bloche wie dr Russi duet schwätze!

Im Regierigsroot diskutiere d Dame und d Heere,
wie me z Basel dr Leonhard Euler wott eere.
Dasch doch dä - maint d Eva Herzog ranzig,
wo gsait het 2 und 2 isch zwaiezwanzig!

Sii, dä Zeechen-Abdrugg im Albuladaal,
vo däm Saurier-Huen isch phänomenal.
Hätt’s zwai Zeeche mee, heersch e Geolog schnuure,
miesst men aanää em Blocher sy Frau syg do duure!

Hallo Abderhalde Jörg – du bisch no robuscht,
nimm bitti dr Herr Merz-Wärt-Styyr an d Bruscht,
mach em e Brienzer, ass er ins Säägmääl fliegt
und im Schwitzkäschtli d Blauzunge-Grangget griegt!

Yych schaff jetz au bi dr Stadt - sappremänt
als EXIT-Verdrätter im Baudepartemänt,
fir d Frau Schneider mach y Baulyyche-Laitig
und fir die alt MUBA-Halle d Stärbebeglaitig!