Ych ha im Draum dr Blocher gseh bim Pabscht im Vatikan.
Bi beide blitze d Auge häll, e bizzli wie im Wahn.
Dr Benedikt sait : Christoph loos so langsam reggsch mi uff.
Rächts vo Gott hets nur ei Blatz und dört hogg ych scho druff.

Well  D ums verregge nid hesch folge welle,
ha Dr halt vo myne Gselle dr Stuehl lo uusestelle !
 
Ych ha mym Kalb ans Härz gleggt, für syni Zuekunft empfohle,
es soll sich möögligscht glyy, Root bim Bruefsberooter hoole.
Dä sait: S isch ganz aidütig wies für Dii mol wyddergoht,
esoo wie Du in d Wält yyneluegsch wirsch mol Frau Bundesroot.

Ych ha mir lo saage, dass Schwyz Tourismus haig welle
s Fräilain Hinggis als Wäärbegsicht  2’08 aastelle.
Es git doch nüt Schöners juhee, juhee
als d Martina, Bäärge und – Schnee.

Ych bin e Baselbieter und Partner vo dr Stadt.
Ych gang gärn ins Theater, au d Uni find ych glatt.
Und duesch eus öbbe frooge, öb mir mee zaale wei,
denn heissts nid, dass me luege well, denn sääge alli: Nei !

Ych bin e Baselstätter muesch mir nid ko so krumm.
Ych zaal gar kaini Stüüre, he Mann ych bi nid dumm !
Duesch du uns mol frooge: Wotsch Gäld vo Sozialamt bikoo ?
Denn kaine sage luege welle, denn alli saage: Joo !

Ych finds unaständig und s macht mi richtig muff !
Dr Murer sait s Rütli sigi nur e Wiise mit Kueflaade druff.
Drbyy het sone Flaade und dä Spötter Äänligkaite:
Au dä isch bruun und duet drzue en üüble Gschmagg verbraite.

Ych ha my grfeut, ganz ehrlig, uff e Huggel und e Dääge.
Wiider Spiiler us dr Regio, isch das denn nid e Sääge ?
Au dr Streller ka dr FCB vo mir us gärn no bhalte.
Falls dää nach em Matsch emol wurd syni Schnuure halte.

Ych due dähei am Kuchitisch ame mit dr Alte strytte.
Si sait mir Duubel, Dottel, Dotsch, ych iire dummi Gryte.
Mir spiile das Spiil vom Morge frie bis am Oobe spoot.
Mir hänn do draa e riise Blausch. Mir nennes Bundesroot.

Ych ha mir Reizwösch welle kaufe in Züüri oder Weil.
All die Erotikmässe, die sin doch schandbaar geil.
Meinsch mi Alti wurd das reize ? Vergiss es joo wo häär !
Wenn ych  bi iire lande will, spiil ych besser Knut dr Bäär.

Ych möcht Euch gärn dr Ospel als Bundesroot empfääle.
Me sott dr Marcel nid länger vo dr UBS lo quääle.
In Bäärn könnt är ganz sicher uff e Aagwöhnigszyt verzichte
Niemer isch doch besser gwohnt s Gäld vo andere z vernichte.

Ych ha Gottloob nid miesse wääle, ob Murer oder Diener.
So wirgglig glügglig mache, die zwai woorschyynlig niemer.
Mir ischs egal, es soll doch jeede wääle wär er will:
Är oder si s isch einerlei: Es isch e Züürcher zvill.

Ych hoff iir händ alli sTram gnoo oder sind do aane gloffe.
Wäg dä viile Tryybhuusgaas sin sy z Laufe fascht versoffe.
D Klimaerweermig isch nid nur mies, ych cha au Guets drin gseh:
Wäg iire fäält bald, Gott sei Dangg , s Iis für en EHC.

Ych empfiil unsem Natitrainer für e Matsch gäge d Türggei
dr Beni Huggel, näbem Streller, Alex Frei.
Well mit unsem Beni wäärde mir sicher Pünggt bichoo,
dä weiss am allerbeschte, wie me duet Türgge schloo.

Ych cha dä Saich nüm luege, han y letschti grad beschlosse.
Und drum mit Schwung mi Färnseh zum Fänschter uusegschosse.
Damits mynere guete Stuube wiider uffs glyych Niveau längt,
han y drfüür e Wahlplakat vo eusem Erich aaneghängt.

Ych ha gnau könne verfolge, was dr Bader vor dr Blocherwahl
gsait het zu de Fraue und Manne im Nationalrootssaal.
In dääne hailige Halle hets nochhär grausam gstungge.
Dä het halt no am moorge frie e Glaas mit Hardwasser drungge.

Ych muess hüt zoobe zuegee Fremdwörter kenn ych nid so vyyl.
Ych bi halt nur e glaine Buur, kenn zum Bysbiil pädophil.
Weiss maskulin heisst männligg, Nusscreem heisst Nutella,
mee waiss ych halt leider nid -- doch gäldgail dasch vasella.

Ych stuun immer wiider drüber, wär Politigger will syy.
Macht macht anschyynend süchtig, dass zeigt uns d Hillary.
Obwohl scho iiren Alte, d Lewinsky hät sotte lo syy,
brobierts au sii und für d Affäre hänn mr hüt dr Sarkozy.

Hänn dr gseh das guete Stügg, ych main d Frau vom Sarkozy.
Y find ,die isch däm z Gönne, me ka doch nid so syy.
Nur dr Mörgeli dä rysst e Stai, dä duet vor Nyyd erblasse,
dä hät au gärn e Bruni, wo zu ihm dät basse.