Mir sinn z Paris gsi mit em neie TGV.
Dää faart so schnäll, doo duet dir s Uuseluege wee.
Zrugg in knapp vier Stund – doch mir dumme Sieche,
hänn gliich lang gwartet z Basel fir e Dramm uff Rieche.

Noo n em Match vom FC Thun vor der Kabine,
waarte „Groupies“ – alli zämme dränge n iine.
D Gigi Oeri schreit, e soone Spiiler wetti
und in der Duschi wartet d Nella Martinetti.

Vier Joor lang duet der Bundesroot sich ummestritte.
Es riefft der Christoph: „Michelin Du linggi Grytte“,
der Couchepin schreit, der Blocher syg e Mussolini
und der Schmid dää dräumt vom Doris im Bikini.

Es doppt sich d Hingis und der Landis Floyd doppt au.
Und mänge Maa doppt sich im Ghaime wäge der Frau.
Es mergt s kai Sau, doch s doppt sich au der EHC.
S Verliere duet dangg Schmäärzdablette nimm so wee.

Es goot em Schweizer bi de Waale bees an Kraage.
Jetz wo n äär wisst, was äär in Bärn hät welle saage.
Me wird dää Hinterbänggler z Bäärn jetz nimmi gsee ,
derfir het s Moolergschäft wider e Pinsel mee.

Mir saage s doo, dää Blaan isch aigentlig gehaim.
Es gieng der Blocher gäärn ins Bärner Altershaim.
Nur wänn s in nit, will äär scho meerfach haigi glooge
und si hänn Angscht, äär däät die türkisch Putzfrau blooge.

Es het der Stäärbehälfer scho grad welle schiesse,
doo het äär gmergt, dää will jo nur der Parkplatz gniesse.
Will bis d in Basel ändlig hesch e Parkplatz gfunde,
gseesch d Riebli ooni Dignitas scho lang vo unde.

Der Marcel Ospel kriegt jetz nur no zwai Millione.
E so duet s Schaffe sich jo wirglig nimmi loone.
Kai Bonus isch scho schlimm, no greesser isch der Schregg,
wo n äär erfaart, fir in git s kaini Reka-Check.

Es hätt der Sarkozy der Malama au gwäält,
will ain wo glainer isch als äär het im no gfäält.
Doch dää isch z Bärn - deert het me scho, das isch kai Witzli,
im Nationalrootssaal montiert e Kindersitzli.

Es goot der Bundesroot e Metzgete go ässe.
Die sinn so froo und hänn der Blocher scho vergässe.
Bim Suurkrut duet fir alli Siibe d Sunne schiine,
s Doris bringt e Lääberwurscht der Braitwääg iine.

Ooni Franzeesisch z Bärn - Herr Straumaa das wäär z haiss.
Euse n Erich maint: „Je blanc - oder ich waiss“.
Jä, der Janiak ka Franzeesisch und au Bärn;
und der Erich ka uns alli zämme gärn.

In de Schuele z Basel duesch ganz cool ains kiffe.
Kasch de Maitli, unscheniert an Buuse griffe.
Darfsch mit em Mässer stäche - schloo diräggt in Maage,
Hauptsach kasch Entschuldigung auf Hochdeutsch saage.

An der Ändusschaidig fir d Miss Bundesroot,
wo d Widmer-Schlumpf so uff em Laufstääg ummestoot,
sait d Michelin zer Doris, mii steert s also nit,
dass s jetzt im Bundesroot e Wieschteri no git.