Y bi am Schacher Sepp si Küe, in Basel rächt bikannt,
und sing no syner Melodie, mängisch öi provokannt.
Bi zfriide wenn d Lyt lache diend - und ych mi Fride haa,
u wenn’s denn öi no “ryyhme“ düet – s’isch alls was bruicht ja ja.

Der Gerspach dä het ungeniert
und wyylyttsäälig abserwiert.
Wenn aine dääwääg maischterhaft - fremdi Stitz haimdrait,
no waisch jetz au - worum me so aim - Seggelmaischter sait.

Der Marcel Ospel gheert me brichte:
“Wenns sy mues, duen y halt verzichte!
Uf my Bonus – s näggschte Joor!“  …das sin ganz neji Deen,
mit em Erfolg, dass z Wollerau jetz d Stiire uffegeen.

Wo d CVP in säller Nacht
mit de Lingge s ghaime Päggli macht,
maint der Couchepin:  „Liebe Christoph  –  allem Aaschyyn aa,
gits fir dii – im Bindnerland  - e guets Generikaa.“

Wo s wältlig Gricht der Bischoff schoggt
und sait – wo dass der Deyfel hoggt,
maint äär in syyner Seelenoot: „Vor Gricht will y nimm glaage,
y rais jetz ganz elai uf Rom und dues der Mamme saage.“

D Paris Hilton isch an d Schmuggmäss koo
und het no schnäll zwai Cüpli gnoo.
“Si fiel sich doo in Ziiri wool“ sait si de Journalischte.
Denn het sy no drei Cüpli gnoo …und isch wiider zrugg in d Kischte.

E Gweer im Kaschte fieri halt
lut Fetz zue eheliger Gwalt.
Yyverstande – aber graad - wäge dääne Gwalte,
wett y wenigschtens my Helm none bitzli bhalte!

Wo euse Erich – der “Fascht-Ständeroot“
mit Glanz und Gloria undergoot,
do froggt en d Bräss: „Herr Straumaa - sin sii jetzt deprimiert?“
“Jo – der Depp bin y scho lang – aber s erschte Mool prämiert.“

Dä Basler Schugger got uf en yy,
mit Ruggsicht und ere Gsprööchstherapie.
Und won er denn dä Hooligan, am Schluss umarme wett,
gspyyrt är uffsmool, dass en sälle lätz verstande het.

Unsere Moritz  –  dää us Bäärn -
hätt fir d Umwält no so gäärn,
en Abgoob wägen em CO2 – jedesmool bim tangge.
Und ych als Kue -  ych zaal dängg denn – fir jede Fuurz e Frangge.

Wenn der Prinz Härry mit Eel am Huet,
sym blaue Bluet alli Eer aaduet,
han ych fir iin Verständniss – dä het nur ai Besträäbe:
E sone Clään, dä kaa me numme bsoffen iberlääbe!

Der Leuebärger schrybt e Buech
und Michelin singt – mee als Versuech,
s franzeesisch Liedli  «Les trois cloches» - waas sell das bedytte?
Uf allfäll het der Blocher denn die Glogge gheere lytte!

Im Wärbespott vo der Dignitas,
heisst’s:  “Nuur mit uns macht stärbe Spass!
Drum biete mir – als Schnäppli – mit em Doggter FMH,
useri Dienscht jetzt neischtens au – uf Kaffifaarten aa.“

Y han em Blocher – will er so dra hänggt -
son e wysses Spiilzyyg-Scheeffli gschänggt.
Kuum het er s gha, do griegt dä Maa Biibeli und Angina,
oh hätt em doch e Schwaarzes gää – die Wysse sin uns China.