E Reporter hett dr Blocher gfroggt,
ob in di Abwahl nit doch bloggt,
he nai, jetzt kenn är no vyl besser wyte,
syt är di 6 schwarze Schoof nimm mues hyte.

Mir duet das in dä Auge weh,
wenn ych dr EHC Basel seh,
di spiele wirgglig schampar mys,
s ainzig glatte isch no s Yys.

Ob fir s Tennis oder d Maschine, di us Zug,
no ni hett s ghaisse syg Betrug,
drumm kenn si dä Rummel nit verstoh,
si haig doch immer fir alles Pulver gnoh.

Dä FC Thun hett doch e Knall,
am liebschte spiele si ohni Ball,
und Tabälle zaigts jo nach 19 Runde,
am weehlschte isch s ne doch im Käller unde.

Di Models sin alli rank und schlangg,
fir mi Begriff scho ender grangg,
uff d Woog sotti di jo nur im Suff,
eso wär s Gwicht doch dopplet druff.

Ai schwarzes Schoof, dr räschte wyss,
und scho macht me e hölle gschyss,
an dr Tour de France hett s kaine gsteehrt,
dert isch doch s ganze grad umgekehrt.

Ain vom Blick behaubtet y kenn nit singe,
und dr Text yberhaupt nit ybere bringe,
y han em gsait verzell kai schaiss,
y ka nit drfyr dass y Pierro(t) haiss.

Won ych s gheert ha sin mir Träne ko,
si hänn im Ospel dr Bonus gnoh,
y glaub y schrybem e liebe Gruess,
är soll sich mälde bevor är bättle mues.

Bi däre 5 Minute Liecht ab - Aktion,
gits bletzlig e schampar lutte Doon,
mach s wider a, schreyt mi Frau ganz gschoggt,
wo näbe mir im Auti hoggt.

Yberall hetts di Noteständer ka,
mit dr neje Zyttig punggt CH,
vom Gundeli bis Glaibasel, i finds jo toll,
nur froogi mi wär s dert läse soll.

S Problem mit Stärbehilf, wo s do jo git,
das kenne si in China nit,
findet ain si Läbe nimm so cool,
denn gän sim aifach e Spiilzyg ins Muul.