Z’Basel a mim Ryy. Mir springe albe dryy
Wäschen-is und dringge druss, s’macht dr Gsundhait gar nyt us.
Hän derbyy sogar dr Doggter gspaart.
Andersch wär’s mit Wasser vo dr Hard

Niene mee kai Schnee mee z’sgee! Turischtenoort dien daarbe.
S’tuet wee: Zum See git’s niene Schnee, statt Wyss nur grieni Faarbe.
E Dyp vom Toggeburg dailt mit, won-äär mi hooselupft:
Es gääb scho Schnee, är blyybt nur nid, will d’Hinggis alles schnupft.

Dank i-Phone haan-I d’Abwaal vom Christophorus live gsee
Uf www.black-sheep.com als Stream vom Boodesee
Dr Toni Brunner hett lut ghyylt, duet offesichtlig lyyde.
S’isch will är nid gnau weiss wie me Opposition duet schryybe.
Em Christoph wintsche mir, au wenn är toobt hett wie ne Muuni,
Als Dreeschterli e neie Schatz, e Carla, sone bruni.

«Exgyysi, hesch mer ächtsch e Stutz, du schyynsch mir soone Nätte.
I gang dermit in Bruune Mutz und wird deert fir di bätte.»
Dä Dyp wo so sys Gäld verdient mit Sprich so hoochgeniale
Dä hett mi letschti no bedient ir UBS-Filiale

Kenned ir das Gschichtli scho, vo däm arme Eskimo,
Wo, will är hett haiss bikoo, Nach Europa gschwind isch koo.

Är hett gsait, das goot nid so, «I-ha haiss, bi nimme froo
Heered uff mit haize so Vergässed bitti nid Kjoto.

Doch uf Bali, jodernoo Hän si in in d‘Mangle gno
Denn es sigi sowieso Sini Schuld an allem doo.

Will är nämlig albe no Haize duet mit nassem Stroo
Und nie wissi, was är do Duet us sim Kemmi useloo.

So isch unsre Eskimo Deprimiert an Pol zruggkoo.
Wird syyner Läbdig nimme froo. Hett nid emol e Cembalo.

Kompensiert syys C2O Isch neutral sogar im Klo.
Tuet Defflifaare unterloo. Und isst si Fisch vo jetz a roo.

Sushi haisst’s gemäs Kjoto.

In Basel kasch im Summer als flaniere
Dr Ryy entlang kasch s’Minschter straale see
Dä Summer wirsch in Fan-Zones promeniere:
E Druggede wie in dr SBB.

Die Euro wird e Moordsevent. Am Ryybord wird im Schlooffsagg pennt.
Dr Goop schryybt sys Bier neu Tschechisch aa.
D’Clarastroos ai Urinal. Schwoobe hett’s ee iiberaal.
Und d’Thuner mache fraidig glaini Maitli aa.

Das wird e Hammer-Euro-Summer!
Mit Fescht und Fuessballfete do am Ryy
Die ganzi Wält kunnt z’Gascht zu uns nach Basel
Uns macht dä Summer Kummer, gseesch das ii?

Berlusconi – s’goot au ooni, Georgy Busch isch au bald duss
Tony Blair will niemerts meer, dr Boopscht nimmt en denn scho.

Dr Stäuber macht sich us em Staub, em Putin hett e niemerts glaubt
Dr Christoph B wott niemerts mee, Wältpolitik isch so.

Dr Olmert isch glyy wäg vom Fänschter, Chrétien du bisch au e Gängschter
Dr Fidel Castro kratzt glyy ab, nur z’Basel macht no niemer schlapp:

Anita Lachemeier: Unsre Politexport, e ganz spezielli Sorte.
Anita Lachemeier: Hebed e bitz Geduld, es isch nid iiri Schuld
Anita Lachemeier: Sie weiss nid was si macht, doch macht’s mit aller Graft!