D Helvetia het e schlimme Draum – Nacht fir Nacht dr glyych:
S stygt ain zem Stuubefänschter yy, e grässlig Monschtervyych.
S kunnt nooch und neecher an iir Bett und flischteret ai Satz –
d Helvetia schreit, wo s Monschter sait: «Guets Mörgeli, my Schatz!»

 

Ass d UBS z Ameerika vyyl Gäld abschryybe duet,
das findet au dr Marcel Oschpel z Ziiri nimm so guet.
Und doch maint är: «Ych ha s im Griff, dotaal, s laufft nyt verkehrt,
kai Angscht, ych ha scho in dr Schuel perfäggt abschryybe glehrt.»

 

Fraktur am Ooberschänggelhals – acht Mooned Bruederholz.
Druffaabe Gallebloose-Stai – drey Mooned Pflääghaim Scholz.
E Beggibruch – Kantonsspital – au das het uns nit gsteert,
mir hänn dangg all de Schweschtere säggs fremdi Sprooche glehrt.

 

Was macht dr Christoph Blocher jetz, wo n är z Bäärn nimm regiert?
Zem Gligg trainiert är d Nati nit, jä d Schwyz wäär scheen blamiert.
S hätt d Fuessballnationalmannschaft statt elf denn nur zää Maa:
Im Team vom Blocher het s no nie e lingge Fliigel gha.

 

Was macht d Martina Hingis jetz, wo sii nimm spiile duet?
Striggt sy? Wäscht sy? Lehrt sy Dytsch? E Sproochkuurs wäär scho guet.
Jä nai, sy butzt d Pokaal und dänggt: Do driiber frai ych mii,
die guete-n alte Zytte sinn halt Schnee vo geschtert gsii.

 

«Aus Sympathy für Öschterreych ischt es jetzt höchschte Zeyt,
dass ouch der Schweyzer Sportminischter Lääderhoose dreyt.»
Das sait dr Sämi Schmid in Bäärn, leggt d Hoose-n aa adrett
und zaigt dr SVP, ass är no lang Sitzlääder het.

 

Es lyttet ain vom Schauspiilhuus em Schuggerposchte aa:
«Es überrenned uns die Leut – schickt sofort hundert Maa!»
«Wievyyl sinn s denn, wo yyne wänn?», frogt druff dr Schugger Klaus.
«Jetzt kommet schnell, s will niemand rein, die wollen alle raus!»

 

Mit easyJet fliegsch noo Paris in nit emoll zwai Stund,
ganz logger, gmietlig, ooni Stress – zem Schimpfe hesch kai Grund.
Fir glyych vyyl Gäld und glyych vyyl Zyt – das het uns fruschtriert –
hesch z Baasel zwai drei Kaffi gnoo und s Auti kuurz parkiert.

 

Bis uff e Fäldbärg mechte mir e Reegio-Drämmli haa.
Das wäär e-n ächti Addraggtion, bikannt bis Afrikaa.
Sy strytte no, eb s Drämmli sell bis oobe uff e Groot.
Egaal, sait doo dr EHC, wenn s numme uffwärts goot.

 

Am Gränzstai stoot e schwaarzes Schoof, wo gäärn in d Schwyz mecht koo.
Sy Mammi sait: Bass uff, my Kind, deert aane daarfsch nit goo.
Die wysse Schoof hänn Schwaarz nit gäärn, jä, Schwaarz isch deert e Schand,
sogaar dr Pfarrer – dä vo Röschenz – jagt me us däm Land.

 

S gitt blaui Zunge bi de Kieh – e Muggestich – wie dumm!
Drgeege hilft doch prophylaggtisch numme AntiBrumm.
Wo d SVP sich z Baasel trifft, hänn mir dr Saal voll gspritzt,
s het nur nit geege d Striggedde mit bruuner Zunge gnitzt.

 

Es zupft e Typ im Laaborschuurz: Het s ebbis oder nit?
Es het, s het nit – es het, s het nit – villicht het s, villicht nit.
Bim letschte Blettli isch es glaar und är schrybt mit sym Stift:
Es het im Wasser us dr Hard – ganz bestimmt kai Gift.