I halt nyt vo Fuessball – i hass all dä Mais,
Wäg dr Fan-Meile zaalt mr dr Eymaa e Rais.
Är putz au my Voorgäärtli, noohär – drbyy,
drybt är jo dä Stutz yber d Styyre denn yy.

D Landschäftler dien fyyre – in Augscht ganz biwäggt,
e Dail losst dr Partnerschafts-Väärs grad ewägg.
Druff macht am Birskepfli die erschti Brugg schlapp,
Jetz rysse mir näggschtens die andre no ab.

Die Federer-Maargge hebt s Gläärli uff Draab,
si schläggt „ihre Roger“ pro Daag zwaimool ab,
vom Knut bsoorg ere  kaini – nai Si – dasch mr fäärn.
Denn Schwoobe die schläggt si halt nid esoo gäärn.

E Mamme schmaisst d Kinder in Dood – ganz elai,
Drey Gnäggis vergeen sich am Gspäänli dehai.
Im Gimmi verschiesst aine sämtligi Lyt;
Und mir hänn e task-force fir Cervelat-Hyt.

Wenn 16 Milliarde willsch d Schyssgass abloo.
No hätti als  Motto „You and us“ nit grad gnoo,
Jetz findi dä Slogan erscht rächt zimlig spreed -
do bassti scho eenter : „Mir sinn halt so bleed“.

As d Striggede singe am SVP-Daag,
isch mir zimlig wurscht – wil i baidi nit maag
Glyy hett me druffaabe vo däre Waal-Schlappe gheert,
jetz hoff y die singe no zwai-, dreymool deert.

S Blakaat mit de Scheeffli het vyyli schockiert,
Imain – wäg em Sabo -  s syyg vom Koch finanziert.
Woni heer s syyg vom Blocher, hani dänggt, myy braichts au,
no de schwaarze geen die wysse - wäg de bruune - dängg au.

Dr „mhmh“ isch abgwäält – my Ghaimplan het glappt,
dr „mhmh“ und dr „mhmh“ sinn in d Falle dappt.
Der dängged an d Pointe – s git kaini – das wärs,
Däm dueni nit d Eer aa mit'me aigeneVäärs.

D Aggtie falle – dr Brootbryys ziet aa,
dr  Spryt kaasch scho glyy au als Zwaierli haa.
Goot das esoo wyters – no zaalsch denn bigoscht,
dr ney Kaare mit Bargäld und leasisch dr Moscht.

Rauche isch deetlig – s stoot iiberaal grooss,
Als Raucher lääb yych scho glyy ganz uff dr Strooss.
Drotz allne Giftschysser hoff ich als wie mee,
wenn i s Comeback vom Theo wo Pfyffe raucht gsee.

Kaaschs schiebe und draaie und drille wie d wottsch,
das meergg nit nur ich, nai das meerggt jeede Dotsch
Nit Bärn, nit dr Jura hets no Basel verschoobe;
Nai, do drugge verglemmi vo Norde här d Schwoobe.

Dr Schampe, my Frind, dä isch ambetiert,
will s Gouvernement z Bâle syni Parkplätz changiert.
Ecoute, Schooffsuuri, droot är , lehn dos sy,
sünsch ischs mit de Sparse und em Wysse vorbyy !

Mir spiile – oder gänn uss – haisst  s Sujet –sygs wie s well,
Ainewääg zaal i das Joor fir alls woni bstell.
Mir gänn uss haisst s Sujet bi dr Euro 08,
Deert zaale mer mee als mer bstellt hänn – Guet Nacht !