Mir hätte gärn dr Bischof Koch an Morgestraich yglade;
Sy Goschdym basst und ebbis Luschdigs wurd däm Ma nit schade.
Dr Grund, worum är abgsait het, lyt bi dr Ziibelewaje:
Är het halt schregglig Schiss, wie son e wältig Gricht ka blaie.

Dr Migger sot syt Stunde scho sy volli Bloose lääre
Und traut sich nit in s Wägeli, wo dinne d Pissoir wäre.
Es hät em halt, so het är dänggt, bassiere kenne, dass
Är us verseh in Wage ystygt vo dr Dignitas.

E Kryse het dr Bürgerblock, wel s d Gwärblerlyschte git.
Das Kryseli haisst Iseli – nur merggt s es laider nit !
Si hän, bis d Wahl verlore isch, verbisse miesse händele;
Jetz mache au die Liberale wiider mit bim Sändele …

S git um die neje rote Rettigsring e Riisegschyss,
Denn gseht dr Dänggmolpfläger rot; är hät si lieber wyss.
Mir isch doch wurscht, ob d Rettigsring jetz wyss sin oder rot -
Bi däre Art vo Dänggmolpfläg kunnt jedi Rettig z spot.

Im Buckingham Palascht mien si mit iire Prinze stryte
Die suffe sich dur d Nachtlokal mit hundskomune Grytte
Do ka die gueti Queen jo um d Franzoose nur no froo syy
Wenn eini wirgglig gar nim goot, no nimmt si dr Sarkozy

Dr Ospel het e SMS versändet an Vasella
Nimmsch Du nit au in näggschter Zyt e besser zaalti Stell aa
Dr Daniel losst dur d Sekretärin sofort d Antwort zische
Mir kennte mitenander statt däm Inder Stroosse wische.

Im Kryzworträtsel frooge si, und zwar bi „Waggrecht vier“:
Wie heisst im Schweizer Alpenraum das höchste Rüsseltier ?
D Frau Hueber dänggt an Hannibal und kritzlet: „Elefant“ -
Jetz isch doch däre guete Frau dr Couchepin nit bekannt !