Wenn y bi dr Martina Hingis, so in aller Ruee,
an die Wäschmaschiine-Wärbig zruggdängge duee,
no muess y saage, jä s duet mr jo laid:
E bitz mee Kokain hätt si scho no verdrait.

Dä Verglyych vom Cuschpäng, dä nid so fyyni,
zwische n em Blocher und em Mussolini,
wäg em Persoonekult, mi duet er steere.
He, dr Mussolini ka sich jo nimm weere.

Z Baasel het doch bi de Ständerootswaale
ein kandidiert, glaub vo de Liberaale.
E Pointe iber dää wäär sicher gsässe,
nur ha n y laider dr Namme scho vergässe.

Sii, am erschte Auguscht uff em Rütli, dasch doch scheen,
wenn soo vill Fraue an d Bundesfyyr geen.
Wenn aber dr Ueli Muurer dert isch, lägg,
no isch es wirgligg numme e Matte mit Drägg.

D Blakaatgsellschaft kämpft, das find y guet,
dass me weniger Blutti uffhängge duet.
Am maischte lyyd ich nämlig Quaale
Wenn y alli die Ärsch gsee - vor de Waale.

D Wisseschaft warnt syt ville Joor
dr Mensch vor dr meeglige Klima-Gfoor.
Und bis mr wisse, was doo drhinter steggt,
sinn mr scho lang am kinesische Spiilzyyg vereggt.

Me kaa vo dr Regierig, mir nämme s Aagebot aa,
wäärend dr EM verbilligti Ferie haa.
Jä, das wird soo schlimm, dass au mir flichte mien:
Mir geen in dääre Zyt an d EM uff Wien.

 „E Bumms an d Latte, ou, drnääbe!“
Das kasch bim FCB erlääbe.
„E Latte, e Bumms, und er isch dinn!“
Do kunnt aim dr FC Thun in Sinn.

No dr Abwaal vom Blocher wird s mr halb schlächt,
y froog my und hoff, y heig nid rächt:
Ibernimmt er jetze, fir mii wäär s e Gruus,
vo synnere Dochter s Läggerlihuus?

S will e Räggter e Leerere, i finds e Katastroofe
will sy e Krimi schrybt, ganz hart bestroofe.
Y gsee do halt mee s Positive draa:
Do isch no naime n e Leerkrafft, wo schryybe kaa.

„Liebe Gott“, due n y syt finf Joor bätte,
„mach uss em Bischof Koch e Nätte!“
Nach finf Joor Bätte waiss y jetzt:
Au em Liebe Gott sinn Gränze gsetzt.

D Schwoobe straike, d Ytaliääner au,
d Franzoose straike und mache Radau,
bi uns, do straike sy uff em Bau.
Tschau.