I bi dr Blocher Stöpheli, im ganze Land bekannt
Bi dr flottischt Bundesroot gsii - sicher kai Vagant
Und stand i mool am Himmelstoor, spiil ich my letschte Trumpf
Dass ich nid uf die glyychi Wulke chumm wie d Widmer-Schlumpf

My Groosi stoht am Baarfi vor däm neue Touch-Screen-Kaschte
Äs toucht mit syne Batschifinger - rueig und ohni z haschte
Touch, dr Achter haut em ab, touch, dr Ainer, touch
Äs toucht und toucht, denn gryynts und git, patsch, däm Screen e Watsch

Fufzähtuusig Schugger, mit Stahlhelm und mit Gnüppel
Die halb Armee vom Sämi Schmid, fümf Füüsel uf ai Rüppel
Panzer rund ums Staadion, wo im Äärnschtfall knalle
Sankt Jakob isch für d Schlacht berait - jetz fählt nur no ne Balle 

Vom Marcel Ospel syner Frau in Wollerau erfahri
Dr Maa syg uf Safaari in dr Wieschti Kalahaari
Irgend ainisch underwäggs - wenn syg nid bekannt
Setz är denn die näggschde paar Milliaarde in Sand

Will är mit dr Alinghi dr Cup e dritts Mol welli
Suech är die beschte Lüt, strahlt dr Ernesto Bertarelli
Drum packi är in Buckingham d Gläägehait bim Schopf
S syg optimal, dr Charles haig nämmli d Säägel scho am Kopf

D Frau Friidli het geboore hüt, e Fritzli, und voll Luscht
Rieft dä Fritzli: mäm-mäm - und stüürzt an d Mueterbruscht
D Hebamme hebt dr Finger uf und mahnt dr Fritzli: Schatz
Bitte sags auf Hochdeutsch und mach einen ganzen Satz!

D Uni het kai Platz meh in dr Stadt, s lyt uf dr Hand
Me züüglet glyy zum liebschte Partner, sprich: uf Baselland
Klaar, dass men in Wintersinge schon e bitz nervöös isch
Drbyy hai die dr Straumann als Profässer für Franzöösisch  

My Bueb, dr Max, är het chly Stress in Mathe und duet schiile
Isch haimlig ab mit all mym Gäld und isch es go verspiile
I ha dr Max vor d Hütte gstellt, do het dä uf dr Schwelle
Als Abgangsentschäädigung no fümf Johr Sackgäld welle

Dr Gölä und s Martina Hingis häi vom Truubel gnue
Schmaisse Mik und Racket ane, wai statt Ruubel Rue
Nur ainisch cha me se no gseh - i finds e Glanzidee
Si singe zämme, s isch dr Wahn: e Schwaan so wyss wie Schnee

Es kunnt e Bäär, wo kunnt er häär, vom Bündnerland, bi Vals
Dass är kä Saich meh macht, trait er e Sänder um e Hals
Dä Sänder macht en halb verruggt, drum frisst er jetz zur Stroof
Zum Zvieri statt wie abgmacht schwaarzi nur no wyssi Schoof

Bim EHC, do föön d Schlittschuekuefe glyy aa roschte
Will kaine meh vom Flägg kunnt, mues me Cracks vom Ussland poschte
Jeedi Wuche zwai bis drei, s sich klar, dass die halt koschte
Doch s lohnt sich, denn dr Bescht vo dääne braicht jo scho dr Pfoschte

Dr Unggle Schaggi vo Brätzwyyl fahrt jetz nümme Schyy
Är isch scho zwaienüünzgi gsii und sott in d Geriatryy
Will Stadt und Land nid ainig syy, wo d Geriatryy sell stoh
Het dr Unggle Schaggi d Schyy halt wider füüregnoh

Mi Fründ het sich sy Bluet lo neh, es duet em hüt no weh
Nid wäg em Stich, vil meh sticht iin: s het nur e Sandwich geh
I han em gsait, so bringschs zu nüt, wie sell das mit diir ände
Machs wien  yych, gang s Aigebluet an d Tour de France go spände

Friener hets im Winter amme wuchelang no gschneit
Und uf dr Strooss bisch wäg em Glattyys glatt uf d Schnauze gheit
Hüt findsch bi uns kai Schneemaa meh vo Basel bis Wildhuus
Und uf e Sagg fliegsch statt wäg Glattyys wäg de Gratisnews

Z Basel herrschi Groossalarm, sait mir dr höggschdi Schugger
Alles numme wäg däm Harry Potter, hools dr Gugger
Dä kääm exakt um Mitternacht, das fänd me do nid glatt
Basel syg scho ohni dä die gröschti Gaischterstadt

Kuurz nach Basel stoosst ain uf dr Autibahn si Kaare
Allem Aaschyyn a wott sy flott Schlitte nimme fahre
Am andre Daag schiebt dä sy Waage wider - Richtig Kaischte
Es tuet mr laid, het är mr gsait, dr Spryt kaa mer nimm laischte

I ha ne Krymi gschriibe übers Faasnachtskomitee
E Milieumoord, jetz wai die mii hüt ab dr Bühni neh
Dr Eymann het mer groote: blyb aifach boggstyff stoh
D Frau Sandrin isch genau esoo jo au in d Top Ten koo

Jetz hürootet de Sarkozy doch die Carla Bruni
Dass die zwai so rasch klar koo sy, ehrlig gsait, do stuuni
Und glyych han yych kai Helge gmoolt, i waiss, dir syt nid zfriide
Doch d Faarb brucht Zyt zum tröchne - und bis denn sy die scho gschiide

An dr Euro 08 randaliert e wildi Hoorde
Vo Hooligans im Staadion, e ganz e struubi Soorte
Dr aint vo dääne het scho vor em Aapfiff soone Rüssel
Dass iin e Dütsche frogt: ham se nen Sprung in der Schüssel
Kuum goots loos, schreit är en alti Daame a: du Protzere
Gisch dick a, drbyy bisch du e Soziaalschmarotzere
D Tribüüne ghöört bi öis im Volk und nid de Meuchelmöörder
Röhrt dr zwait und spaart nid mit de schlötterligschte Wöörter
Do pfyfft dr Schyyri Freistooss und dr dritt hüült: soone Schrott
Du Pfyffe bisch jo nid neutraal, dasch dr komplett Komplott
Dr vierti mit de Strähne rysst e Geegner an der Mähne
Und gröölt, du ghöörsch zum Filz und drum in Quarantääne
E Stuel verliert si Lähne und e Wuurzle ire Zahn
Die Type buurzle duurenand wie uf dr Achtibahn
D Armee gryfft yy und d Schuggerei, do brielt dr Eerschti hitzig
Gohts no, i haiss Baader, d Fraktioon het grad e Sitzig