Bim Blocher syyner Abwaal
sind im Baabscht grad Träne koo.
Vom beschte Mässwyy het äär sich
e Halbe bringe loo.
O Herr fir d’Abwaal dangg yych dir
und riem di Himmelryych,
jetz bii dr ainzig Unfäählbaari
ändlig wieder yych.

Dää super rotblau Flitzer doo
Sii dä isch dr Hit.
Mit däm faart unsre FCB
Autirenne mit.
Und im Verglyych zu männgem Spieler,
das nämme mir doch aa,
wird dä Kaare ganz bestimmt
e bitzli Technik ha.

Syt däm Miiliardeloch doo pfyffts
im Ospel kalt um d’Oore.
Sy Boschte rette im am Änd
d’Araberinvestoore.
Mir hänn vernoo, dass dä Kredit
au baulich Folge het,
an jeedi UBS Filiale
kunnt e Minarett.

Mit finfesibzig Joor
doo gheert me nit zem alte Yyse.
Me faart no mit em Rennwello
und hoolt bim Jasse Bryyse.
Au Schwimme goot no schandbar guet
fascht so guet wie Danze,
Nur s’Hockey sott me blyybe loo
s’git nur uff e Ranze

Fascht jede Spitzesportler saait
Doping wurd sich loone.
E Spritzi doo e Zäpfli deert
bringtene Millione.
Bi dr Hinggis spannt me glyy
Kokain isch s’Lätze;
s’hilftere nit bim Dängge
und no weniger bim Schwätze.

6 Semeschter Mathe,
und no drey Joor Informatik,
e Praktikum bi Microsoft,
zwai Wuche Numismatik.
Dasch s’Minimum an Bildig
fir nur ungefähr z’verstoo,
wie an de neie Automate
e Byyljee uuseloo.

Dr Voorschlaag vom Herr Eymaa isch
im Grund gnoo e banaale:
Fir jede Goof wo nit rächt duet,
solle d’Eltere zaale.
Wurd me das Prinzip au fir
dr Grossroot ibernää,
kennt me z’Basel d’Styyre
uff ain Frangge abenää.

Schyynts muesch das Wasser us dr Hard
duure Filter loo.
Sunscht wurd aim das grad via Bluet
voll uffs Hirni schloo.
E äänlig Phenomeen hänn drum
Keemiker scho gsee,
bi Lyt wo Wasser suffe dien
us em Zirisee.

Wenn mir als uus dr Fläsche dringge
und brinzle dien im Stoo.
Wenn mir uns statt em Birchermiesli
e Pizza leen lo koo.
Wenn niemerts uus dr Kuchi riefft:
„Hesch grad e Minütli“,
jä, denn isch erscht Auguscht
und d’Fraue fyyre uff em Rütli

Am halber Siibeni mäldet sich
s’Basilea zwai.
Mir hänn dr Strolch verhaftet,
faare uff dr Boschte hai.
Denn rase si duur d’Fäldbärgstrooss
und kenne numme hoffe,
dr Boschte haig denn wiirgglig no
bis si kemme offe.