My Doggter sait, ych syyg vvyl z’schwäär
das kääm vom Frässen und Suffe här!
Kaini Härdöpfel mee, kai Flaisch, kai Wurscht
Und au kai Bier mee geegene Durscht!
Jä nundebuggel fändsch das gscheiter,
wenn y uusgsee wurd wie s’Babsi Schneider?

Im Baudepp wurschtlet sy wie lätz
und verschandlet alli Blätz.
Dr Wettstai- Mäss- und Minschterblatz,
au dr Rytimeyer isch fir d Katz!
Jetz duet si uns im Herbscht verloo
doch unseri Blätz – die blyybe soo!

Mir löscht am beschte s Bier dr Durscht,
was anderi dringge isch mir wurscht!
An dr Euro Nullacht numme
gheer y bletzlig zue de Dumme!
Wenn y e Basler Bier wott hindere byyge,
muess y z erscht emool ibere Haag go styyge.

Die Baizer sin jo nit ganz bache,
die Pryse wo die jetz dien mache.
E Bier, e Kaffi koschte finf Stutz,
fascht sovyl wiene Kaffi Lutz!
Das macht doch nyt, iir bleedi Naare
das kaasch, dangg Rauchverbott, wiider spaare.

Zerscht isch die alti Bayrischi verschwunde,
denn d Börse an dr Schiffländi unde.
Statt s Gambrinus findsch hitt e Hüffeli Drägg,
bald goot au dr Bruuni Mutz ewägg
bald heersch unseri Bängg, es isch e Schand,
numme no am näggschte Kebabb-Stand

Wär isch dä Theo nundefaane?
Är raucht Pfyffen und gheert zue unseren Aane.
Me forscht und suecht, froggt alli Lyt,
au ych waiss vo däm Theo nyt.
Doch wisse mer, jetz wenn das au doof isch
wär uff däm Plakat das schwarze Schoof isch.

Dä böösi Blocher het me ghasst,
drum het men en jetz au uuse gschasst.
Me wäält derfir als Bsundere Trumpf
d Frau Bundesreetin Widmer-Schlumpf.
Noomool e Frau, jetz kumm y druss
au z Bärn gits jetz e Frauehuus.

E Studie sait, es syg e Schand,
dass d Schieler uus em Baselland,
gscheyter sin als die vo Baasel.
Das halt y sicher nit fir Gfaasel!
Das kaasch fir alles gälte loo,
s isch au bi de Regierigsreet esoo.

S Evi Herzog duet draa dängge,
in Basel d Styyre langsam z sängge
Wie lang s no got, bisses ändlig kunnt,
das goot no mänggi tuusig Stund.
Noo mänggmool drait sich unseri Äärde
und vorhäär wird dr EHC Baasel Maischter wärde!

Y glaub fir Männer ischs kai Froog,
unzfriideny Fraue sin e Bloog.
S fäält jeedi Motivation,
es kunnt kai Muggs me und kai Doon.
Drum muess jetz aifach nundefaane,
dr Klatsch vom minu wiider aane!