Au vo uns drey isch – das gsehn Sii völlig richtig –
so im Durchschnitt öbbe aini übergwichtig.
Dasch kai Kunschtstügg – Sii, die hoggt ununterbroche,
vor em Färnseh und dört kunnt jo nur no Koche!

Jetz miess me füür die vyyle kriminelle Alte
hüt geriatrisch gnormti Gfängniszälle gstalte.
Drum wette Zwick und Conti - falls sy sich getraue -
im Schällemätteli s neu Altersspittel baue!

Do letschti simmer, suuber putzt, in unsre Hietli
au an dä Altersapéro im Albisgietli.
Wyt vorne duet ys do dä … Dings willkomme haisse
hejo, dä … Dings – wie het jetzt dää scho wiider ghaisse?

S bruucht jeede Heer sy Gwehr - das briele d Eidgenosse.
Miir laischte Gegewehr und hänn grad z leid beschlosse,
es gäb nur ains, wo uns drei Fraue wurd entlaschte:
S Gwehr ins Züüghuus … und dr Maa, dä kunnt in Kaschte!

Wenn Sii in Basel vor dr alte Stadtsilhoutte
ain, wo so rieft im Rhy, ganz blötzlig wette rette,
denn sotte Sii zerscht no dr Dänggmoolpflääger frooge,
öb me’s vom Stadtbild här mit som e Ring dörf wooge!

E Huutarzt maint zur Glöpfer-Froog, s Brobleem syg z leese:
s bruuch statt us Rio jetz halt Därm vo de Chineese.
Denn könntsch problemlos am e Wurschtsalätli nippe
und statt an Rinderwahn stirbsch halt an Vogelgrippe!

Finde Sii nit au, grad das Johr – s hilft kai Muurre,
mien Ospel und Vasella sehr hart undeduure?
Mir hoffe sehnligscht, ass das Schicksal sich no wändet
und frooge: „Hänn Sii scho für 2-Mool-Wiehnacht gspändet?“

Am „Tag der offnen Tür“ isch ain uff s Hörnli gange
und will vyyl loos gsi isch, denn prompt au blyybe hange.
Är wär begaischteret denn zoobe haimzue gloffe -
hät är nit duss e son e Stärbehälfer droffe.

S isch ain im Midlife-Chrysler-4-Rad-Aatriebs-Kaare
offroad – wie sich’s ghöört – zur näggschte Garage gfahre.
Är well jetz für e Klimaschutz sich engagiere
und non e zwaiti Klima-Aalag fix montiere!

Früsch parfümiert zeigt sich z Paris dr Herr Sarkoozy -
gstrählt und yygöölt wie ne Pfau in de Badhoosy!
Gschmagglig fyyn und farbeprächtig – so bewyys er:
„ Isch bin von Kopf bis Fuss halt wirgglisch ein Pariser!“

Uff s Eurogrümpeli dien miir ys hüt scho freue.
Jä, d Bolizey samt Hünd wird d Lüt als Fründ betreue.
Zwoor in aim Fall, do wird Einzelhaft befohle:
wenn d näb dr Meile wottsch en Ueli-Bier go hoole!