D OeKK haisst jetz – jo schigget Eych do dryy-
Moove und Vivao und au Sympany.
Mi Maa maint nur drogge und halbwägs apathisch:
„Das macht mir die Prämie au nit sympathisch.“

Der Hansli goot z Basel in d Schuel – nit vergääbe.
Är leert dert e Huffe fir s speetere Lääbe.
Zem Leerer do sait är: „Ich sloof jetz statt sryybe,
Und denn daile mer d Buess, wo my Bappi muess ryybe.“

No der Nitwaal z Amerika isch doch die Hillary
Vergliche mit voorhäär die wääsentlig Stilleri.
Der Blocher isch noochhäär no wytuus vyyl schlimmer draa:
Däm längt s nur zem Waalghilf vom zwaitbeschte Maa.

Em Bush fliege letschti zwai Schue umme Grind.
Der Ospel bikunnt derfir nommol zwai Kind.
Das interessiert mi zwoor absolut nit grooss,
D Hauptsach isch doch, mir sin die zwai loos.

Ich due mi do inne kai bitzli scheniere,
de ZSC-Lions zem Siig z gratuliere.
S isch sensationell – hey – was wott me denn noo mee,
Es git ai zwai Zircher, wo der Puck kenne gsee.

Der Voogelschutz duet jetz ganz fescht proteschtiere,
die SVP-Raabe dien d Raabe provoziere.
Us Angscht vor de Voogelfrind sait mer my Goldschatz
Scho lang nimm ganz liebevoll: „Du satte Spatz“.

Orange isch d Farb vo de Holländer Fuessball-Fan.
Orange isch ney au der Hammering-Man.
Eb schwarz oder orange, es seen s jetz au d Kälber:
Die Bangg demoliert sich symbolisch jo sälber.

Der IWB-Schuemacher duet so gärn feschte,
Vor allem, wenn anderi grad steen fir d Keschte.
Wenn ych aber s Zaale vergiss in der Unrue,
No macht er wie der Putin der Gaashaane zue.

Wär nyt waiss als Schieler, wird us der Schuel verstoosse,
Wär nyt waiss als Groosse, dä butzt denn halt Stroosse.
Aber jetze git s Hoffnig uff e ganz staili Laufbaan
Fir die wo nyt wisse: Si geen zem Vatikaan.

D Calmy-Rey kaa doch so wunderbar singe
Und Diechli rings umme iir Kepfli drum schlinge.
Eso gfallt si bsunders im Achmadinedschad,
Är hätt si fascht bhalte – schad.