Am BULA-Vordaag kunnt e riese Brummi
mit finfezwanzigdausig Gummi!
Bi Halbzytt sinn d’Pfaadi uff dr Schnure,
dr Pariser-Vorroot isch au scho dure!
Do maint e Biinli – gehnd au ohni draa,
mir mien doch neyi Welfli haa!

Nadyrlig gitt’s in some Cämp
au Bsuech vo unserem Bundes-Vämp!
Koo isch die SP-Ussland-Grytte,
vonere Gämfer Biinli-Sytte!
Mir hänn däm Lysi no miesse saage,
dass sie s’Kopfduech nur am Hals darf draage!
 
Vorem Fliege muesch dy, do hänn mir Mieh,
bim Check-In fudiblutt usszieh!
Prompt isch dert, zwische säggs und siibe,
bi dr Kontrollen Aine hängge bliibe!
Dä hett bigott – s’isch nit vermässe,
e Hakle feucht im Spalt vergässe!

Dr Bush isch bim Reeden ins Offside gloffe,
e Halbschueh hett fascht e Halbschueh droffe!
Das kennt me bim Couchepin au aanegriege,
nur miesste bi däm halt Wanderschueh fliege!
Mir saage den Anti-Couchepin-Fän,
numme kai Skrupel – „yes we can”!

D’Roche losst dä Turm jetzt doch nit baue,
das duet dr Oeri d’Plään versaue!
E paar Milliarde sinn eebefalls wägg,
mitem FCB isch’s au kai Schlägg!
Drfir ka sy – näbscht Solarium-Falte,
wenigschtens dr Gross no bhalte!

Uffeme Buure-Hof kunnt e Maitli uff Bsuech,
e Fyyns, Grazyls, zeme stämmige Ruech!
Dä Rotznaase-Buur – dä sucht e Frau,
stellt Bedingigen und macht dr Pfau!
So hett au dr Ueli in den erschte Stunde,
im Bundeshuus zer Evelyn gfunde!

Wietet e Sturm vo Weschte bis Oschte,
hebb dy fescht am Ladäärnepfoschte!
Gsehsch e Blitz am Himmel zugge,
hebb dy am Baum, due dy jo nit bugge!
Sottsch en Investment-Bängger gseh,
hebsch am beschte s’Portemonnaie!

Bi Oschpels isch in hoochem Booge,
dr Storgg grad dopplet yynegflooge!
Dr Marcel schreit; „das isch dr Hit“,
verwundere duet uns das jo nit!
Dä hett scho vorhäär nodisnoo,
fir aimool schaffe – zwaimool gnoo!

Ych mecht au gärn, sait dr Malama,
so prominänt sy wie dr Obama!
Dä isch mehr als ych, s’ka fascht nit syy,
an alle Hundsverlochete drbyy!
Jetzt moolt sich doch dä aitli Maa,
jeede Morge dr Grind schwarz aa!

Als Abschluss vom Lager laade mir yy
zeme feine Banggett ins Trois Rois an Rhyy!
Zem Dringge nur Rothschild - kai Chianti
drzue Risotto con Vini bianchi,
s’hett Filet vom Oggs und au vom Lämmli
mit frische Morchlen und Aierschwämmli,
Aier vo Wachtle mit wysse Trüffel
Mozzarella vomene gaile Büffel,
dr Schämpis – dä mitem goldige Wäppli
strycht me hinder d’Ohreläppli,
ussem Kueche styyge, mit roote Reesli
zäh Playgirls ohni Unterheesli,
fir d’Leiterinne – bschtellt per Mail
krümmt sich e knaggige Chippendale,
denn ryttet e Rover, s’isch kolossaal
als Napoleon dr Zwait quer dur dr Saal.
D’Moral vo dääre Gschicht, persee,
d’Rächnig zahlt denn s’IWB!