In Züri sait noch 16 Joor - em Lädergärber Stapi      
sy 16jöörig Soon spontaan - und s eerscht Mool:  Sali Bappi!
Dää freut sich - will nümm Stapi syy - spiilt für sy Soon dr Gloon.
Als Bebbi hoffsch, dr Morin Guy - haig au en eltre Soon!

D Baselbieter-Jääger jaage - Keiler, Frischling, Bache,
wil die geile Keiler ständig - frischi Frischling mache.
S ökoloogisch Glyychgwicht blybt - dangg Blei esoo im Loot;
S isch numme schaad, ass daas mit Schroot - nit au bi Raaser goot!

Wär isch die Schöönscht im ganze Land - wie könnt e Frau daas mache?
Sy loot sich d Bruscht vergröössere - bis alli Milchkieh lache.
Sy sprützt mit Botox Schluuchbootlippe - joo, das koscht e Huffe
und s Cüpli muess sy erscht no - us dr Schnaabeldasse suffe.

D Zürcher hänn ganz unschyniert - und au mir Basler sotte -
us Angscht, ass Züri Lüüt verliert - d Kampfhünd glatt verbotte.
Abtue miesst me jetz die Hünd - doch niemer macht das gärn.
Drum schigge unsri Zürcher-Fründ - die Bissigschte uff Bärn!

Kürzlig het dr Ospel Marcel - dää vo Wollerau ,
uff ei Dätsch grad zwei Buschi griegt - vo syner tolle Frau.
Dr Bappe luegt die Zwilling aa - und sait: dr Bueb het Falte!
Dä gib y graad als Bonus zrugg - und s Maitli duen y bhalte.

Das drüllti Dürmli dört am Rhyy - vo Hoffmaa, Roche und Oeri
das loot me syy - will me drbyy - zu de Blagööri ghöri.
Doch d Bsitzerfraue saage n ys - worum me daas nit baut:
Jo wisse Sy, in unsrem Alter - sinn d Spirale out.

Du, Micheline, sait dr Sarkozy - à cause les soldats suisses,
die brüüchte in Somalia - jo scho e bitz mee Biss !
Si sait: Isch hätt une bonne machine, - ein bisschen eine alte.
Mais non, verjaggts dr Sarkozy - dr Blocher dää kasch bhalte!

Ich bii dr Blatter Seppeli - bii üsser Rand und Band,
ich bii es raasends Deppeli - bi Faarte uber Land;
als FIFA-Boss, da gib ich Gaas - und dänk nach ei, zwei Wyy:
bim Füessball isch s wie uff dr Straass, - s chunnt keinu am Sepp verbyy!

Wie kaa me z Bärn im Bundesroot - d Fraue unterscheide?
D Leuthard loot vor allem iiri - grosse Auge weide
d Calmy-Auge sinn versteggt - die miesst me zerscht enthoore
und d Widmer-Schlumpf het Augedeggel - wie zwai Sunnestoore.

Dä Papscht, wo nit so bene tiggt - mit sym hailge Wille,
isch gnäädiger zem Holocaust - as zur Vasella-Pille.
Das kaa me numme soo verstoo: - Wenn d Prieschter sich vergniege,
no dien die Brieder vonenand - jo kuum e Buschi griege.

E Drämler vo dr BLT - froggt si Kolleg, dr Urs:
Machsch du bi dr BVB jetz au e Tangokurs?
Nei danze kaa n y – sait dr Urs und foot grad afo flueche:
Y muess jetz mit em „Credodram“ – e Minschterpfarrer sueche!

Im Kindsgi an dr Gellertstrooss – sait d Lehrere zum Luzi:
Wir sprechen hochdeutsch miteinander – wenn du willst so gut si.
Dä Binggis luegt das Frölain a, studiert e bitz – no grinst er:
My Mammi sait, wenn s iire stinggt jo au: Am Arsch isch finschter!