Dr Roger F. waiss ganz genau:
Si Frindesgrais woont z Wollerau.
Deert hersch dr Ospel graftloos huuche:
„Ai ainzge Frind kennt ich au bruuche.“

Als Räntner han i geschter Znacht
e Byyljeeautomatkurs gmacht.
Jetzt muess i das Joor nur no spaare,
denn kann au ich go Drämmli faare.

I han emoll e Döner gkauft
und mi Katz uff Ali daufft.
Jetzt wird dä Kater observiert
und iiber mi e Fiche gfiert.

Dr Putin droot mit Gasbloggade.
Halb Europa het dr Schaade.
Fir d Ziibelewaaie schaadlos z gniesse,
wär sone Gasstopp seer z begriesse.

Me steent vo dr Breiti bis zer Spaale.
Fir s Eleggtrisch muesch mee zaale.
Im IWB, wär mecht s beschtritte,
bruuchts Huffe Gäld zem Schimmel rytte.

Korräggt politisch setsch agiere,
nie verlaimde, korrumpiere,
will kai Pfluume das vertrait,
ass me dr Palin Zwätschge sait.

Ob Woonig, Deo, ob BH,
s muess alls e Citrusdiftli haa.
Trotz Holland hets an Hyyseregge
nit no Orange welle schmegge.

Dr Raich-Ranitzki dä sait: „Nai!
Dä Färnseebryys nimm ich nit hai.“
Aer haig, so heert me s Volgg verzelle,
sogar dr Schnaabelbryys nit welle.

Milliarde dien si z Gänf vergraabe,
die CERN-Prototone-Wunderknaabe.
Doch die Stütz, mir aane s doch,
verschwinde dert im Schwarze Loch.

Jetzt isch es umme, s ganzi Drama.
Kasch wieder hoffe dangg Obama.
Und was mir bsunders dien begriesse:
Mer bruuche kaini Schue me z schiesse.

Mit Zuggerbroot und mit dr Paitsche
so duet dä Staibrück wietig gaitsche.
Aer waiss doch, ass an de Oase
nur Scheef, Kameel und Esel graase.

Die baide Veegel Herzog/D
hänn Peking mit emne Näscht versee.
Doch s Ai, das hänn si, s isch vereggt,
der Roche ins plaante Hoochhuus gleggt.