Graaie sinn gscheit, drum fielt sich d SVP bidroot
Intelligänz – do gseen die Spatzehiirni root
Die hänn e Voogel, denn die Graaie sinn fir sii nit schlächt
Mit somne Holzkopf hätte miir mee Angscht vor Spächt.

S isch unbestritte: grossi Abfallhyffe stingge
Drum stinggt Neapel au, wo drinne duet versingge
Dr Berlusconi sait, är miech das alles wägg
Und hebbt mit Stiil si Bääsestiil mol schnäll in Drägg
D Lyt sinn begaischteret, denn an däm Goggel schaide sich jo d Gaischter
Doch wenn s um Drägg-am-Stägge goot, isch äär e Maischter.

Sinn au Sii in letschter Zyt e bitz agspannt?
Hänn Aggressioone im Buuch, d Schultere verspannt?
Denne wisse miir fir Sii e guete Wääg zer innere Rue:
Zyyle Si genau – und wäärfe Si e Schue!

Es sinn s Meiers mit em Leerer zämme gsässe
Wil d Dochter Julia aifach nit wuurd zmorgenässe
Si zaale zwanzigdausig Buess, doch das macht iine kaini Soorge
Daas verdient sii denn als Model im ne Moorge.

Wenn ringsumme alli Bangge zämmegrache
Mien Sii trotz Bangge-Gryyse sich kai Soorge mache
Mir sinn Expärte dinn: Noch jeeder Gryyse foosch wiider nei aa
E Bangg-Gryyse hänn mir no jeedi Fasnacht ghaa.

Dr glaini Max mues jetz im Kindsgi Hochdeutsch reden
Wil ooni Deutsch du nichts Anschtändiges kannst werden
Wo s Mami in denn froggt, eb jetz alli richtig gredet hänn
Git dr Maxli straalend uuse: „Yes, we can!“

Dr Chrischtian Miesch isch vo de USA enttyscht
Dä Boschte als Wahlbeobachter syyg doch e Mischt
Är het – doch das bigryfft är eerscht, wo s Fluugi in dr Schwyz duet lande –
Dr Ussdrugg „wale watching" villicht falsch verstande.

D’Bolizei het jetz dr Fyyrdeifel gfasst
Si hänn en gfroggt, wisoo äär Rieche denn so hasst
Es syyg en Umfall gsi, meint dää, är haig kai beesi Absicht ghaa
Äär haig e Blätzli gsuecht, wo me no rauche kaa.

In synre Wienachtsreed duet dr Baapscht verkinde
D Wält gieng bachab wäg de Schwule iirne Sinde.
Obwool dr Williamson dr Holocaust negiert
Wiird äär vom Baapscht in d Kiirche ufgnoo – unscheniert
Wil är kontrazeptivi Bille broduziert
Isch dr Baapscht vom Heer Vasella deegutiert
Wenn me bidänggt, was dä alti Maa fir Saich duet useloo
Isch s schaad het nit sy Mamme denn scho d’Bille gnoo!

Es het is schwäär bitroffe und schandbaar entsetzt
Ass e Mamme s Glai im ICE ussetzt
Mir hänn Mitlaid ghaa und hänn is gfroggt, jä waiss die Frau denn nit
Dass es jetz doch wiider Gratis-Sperrguet git.

Wil s Miri Blocher d Dääfeli duet renoviere
Gseet sich s Baaselbiet die letscht Kultur verliere
Aaber s isch aifach so – au wenn daas die Rambass nit verdraage:
Nur wär se zaalt, deerf zer Kultur au ebbis saage.

Dr Roger Federer het sich doch so Mie gää
Trotzdäm duet dr Nadal d Nummre ains im nää
Bim Ospel syner UBS wird s Gäld scho langsam gnapp
Jä, ziesch uf Wollerau, denn goots mit dir bärgab.

Dr Haider faart diräggt in d Hell – mit sim Kaare
Dr Mörgeli stiggt us em Benz diräggt uf d Baare
Wemme gseet, was Rase bringt, denne git uns das scho z dängge...
Miir sammle zem em Baader e Ferrari schängge.

Dr Obama gwinnt wil d Amis gnueg vom Dschordschi hänn
Dr Maurer gwinnt wil miir dr Blocher nimmi wänn
Si hän vyyl gmainsam, grinse baidi gäärn und lache au mol lut
Au Bruun sinn baidi, doch bim Barack isch s numme d Hut.

Me isch z Israel – und sait das au ganz offe –
Vo dr Drageedie in Gaza schwäär bitroffe
Es syyg nit blaant gsi, dass die Bombe dräffe, brichte unsri Gwelle
Me haigi aigentlig numme Gaza straife welle.

Will me de Kinder iiri Jugend nit wott raube
Duet me s Stimme scho ab 16 nit erlaube
Drbi wärs neetig dass me d Stimme vo de Junge zittig nutzt
Will s die mit 18 bim ne Raserunfall putzt.

Migros Séléction, Primessa, s isch dr Hit
Fine food, Grand crû, ebbis anders issi nit
Anna's Best und Idée Betty, jä worum liggts denn no dinn
As d Basler Drämmli numme Migros Budget sinn.

S gmainsam Sorgerächt soll bald scho Standard si
Doderfir setze sich gschiidni Vättre ii
Doch s git e schweeri Frog wo hitte scho d Jurischte d Mässer wetze
Eb me s Kind denn gmainsam mues im Zuug ussetze.

Im Basler City Beach fliege d Diire n uff
Me gheert Schritt und Schiss und Schrei, es isch ai Buff
D Schwyzer Marine segglet yyne, richtet grad dr DJ hii
Jo, das syyg halt so ne Muusigpirat gsi.