Zu mir kömme Lütt, Sie glaube daas nit
sie bringe Tooschtbroot und Champagner uff d’Fääri mit
sie luege my aa, erwaartigsfroh
hejoo, dr Lachs isch wieder uff Basel koo

Im Ueli Maurer isch das sicher rächt
Herr Bundesroot Maurer, nümm Ueli, dr Knächt
denn reist äär nach Bäärn und isch irgendwie froh
hett ihm dr Schmid e Saustall hinderloh

Nach em eerschte Wuurf han y afoo hoffe
mit em zwaite Wuurt hett är au nit droffe
jetz wüsse mir glyych nit, wie daas knallt
wenn e Halbschueh uff e Halbschueh prallt

E Buur uss Ettige, e bsunders nätte
hett zum Gebuurtsdaag syny Frau zum Tango bätte
sie leggt s’schööne Klaid aa, schminggt sich, gitt sich ally Mieh
denn sinn sie gfahre, vo Ettige bis nach Flieh

Dr Marco Streller hett geschter z’Nacht
syy Ruggtritt vom Ruggtritt ruckgängig gmacht
und hett hütt am Moorge um Verständnis bätte
will äär vom vorletschte Ruggtritt zrugg wott drätte

Letschty Wuche bin y au schöön verschrogge
doo gsehn y tatsächlig e Loch in mym Sogge
drum lütt y däm CERN im Wälschland aa
für zwai Milliaarde könned Ihr’s haa
Luxembourg, hany glääse in dr BAZ
isch gröösser als e Fuessballplatz
d’Laag isch stabil – politisch gseh
es gitt jo döört kai SVP
und d’Bevölkerig längt, nach zwai Mool zelle
zum e Fuessballmannschaft stelle
sie spiele, wenn’s goht, dr Ball diräggt
vor em Geegner (worum nur) hänn sie kai Respäggt
und in Züüri kaa’s, doo pflicht y byy
uss Schwyzer Sicht kai Haimspiel syy
das waiss me doch, in schwäärer Stund
isch Zürcher Boode dr Lätzy Grund
d’Schwoobe dien uns scho lang belächle
wie mir de Pünggt mien noochehächle
aber, als Wunder vo Züüri kaa me saage
immerhin, unsere dütsche Trainer hänn mir gschlaage!

Dem Andreaslein fällt, das war zu erwarten
das Hooochdeutsch leicht, im Kindergarten
und wenn er gross ist und muss einen Baseler was fragen
na ja, dann lernt er „Baseldeutsch in dreissig Tagen“

Wo d’Queen Elisabeth froh und beschwingt
zum sächzigschte Mool „Happy birthday“ singt
froggt dr Charles syny Mamme: Wenn kumm denn yych uff dr Throon
do singt sie: You’ll never walk alone!

So e Banggfiliaale in Bischofszäll
hett Millioone verloore wääge Überfäll
jetz küürzlig isch dr Laiter vor Schregg fascht gstoorbe
doo hett sich au no dr Ospel um e Stell bewoorbe

Dr Barak Obama macht kai grosses Gschyss
s’wysse Huus, sait äär, blybt vorderhand wyss
au die Bäum im Paark löhn mir alli lo stoh
und dr ainzig Bus(c)h, wo ihn gstöört hett, dää isch jo nümm doo

Wo dr Marcel Ospel, nach langem Ringe
syyny zwanzig Millioone zrugg duet bringe
do maint äär, Ihr könned jetz saage, was Ihr wännd
daas wäär jo doch nit guet gange in myyne Händ!