Der Zircher Stapi will nimm schaffe, ai isch das e Gloon!
Noch 17 Joor eerscht het dää gmeerggt, äär het dehaim e Soon!
Dää Ruggdritt gfallt is guet, dää isch politisch au e Gwinn,
mir fraie-n is, dass d Morin-Kinder au bald 17 sinn!

Z Brasilie, im Räägewald, im dieffe Busch versteggt,
hänn Forscher alti Ur-Ywooner-Indios entdeggt.
Doo froggt e soone Wakadu im Interview verschroobe:
"Kunnt der Aeschbi immer no am Fäärnsee-Donnschtig-Oobe?"

In Allschwil, Binnige undsowytter isch s Lääbe richtig cool,
deert spaart me Styyre, het e Huus mit Gaarte und mit Pool,
me reggt sich aber grässlig uff wägen em Fluugi-Grach,
und donneret in d Feerie ab – andere iber s Dach!

Unsere Fifi frisst gäärn Schappi, und zwischedryy e Weggli,
was äär nit verdaut, das kunnt ins Hundekaigel-Seggli.
Neischtens dien mir d Seggli nimm entsoorge, wie me sett,
mir schigge si em Gottschalk – denn dää bruucht si fir e Wett!

Der Papi het si Maieli mit ins Büüroo gnoo,
es sinn au an däm Dochterdaag zwai E-Mail yynekoo.
"Jetz waiss ych, wie s im Baudep lauft, doch ains verstand y nit,
worum s fir das e Loon und jetze no mee Feerie git!"

Der Sämi goot, und d SVP bestoot uf iirem Rächt,
si stellt zer Waal in Bundesroot der Christof und si Gnächt.
Im Parlamänt git s aimool meer e ghaimi Allianz …
… Hoochbrisanz, vyyl Distanz,
Inkonstanz und Diskrepanz,
Dominanz, Arroganz,
Querulanz und Ignoranz,
Penetranz, kai Kulanz,
statt Akzeptanz e Planbilanz,
Mummeschanz und Firlefanz,
e Dorne- statt e Lorbeerkranz,
s fäält an Glanz und Eleganz,
si koschtet Näärve, die Vakanz,
s isch wie an der Hülfteschanz
der allergreeschti Affedanz.
Drum maine mir, die Konkordanz isch, kurz und barsch, am ...

D Zyt vom Bush, die isch verbyy, s isch s Änd vom groosse Draama,
es git e neie 'President', der schwaarz Barack Obama.
An der Riisefyyr bim Schwuur rieft aine lutt: "Hesch gsee!
Das isch genau wie s Abschiidsfescht bim Chef vom IWB!"

Im dieffe Wald, zmitts in der Nacht, doo froggt e Fuchs der Haas:
"Was isch das für e Gnungele?" ‒ "E Schloofsagg isch dängg das!
Doo liggt der Ueli Muurer dinne, im Moos und ooni Zält!
E soo blaant äär die allerbescht Armee vo dääre Wält!"

Der Hakan schuttet in der Wieschti, in Doha bim Abdulla,
Arabisch will äär leere, doch äär foot die Sprooch bi null aa,
Türkisch kann er nimmi, Änglisch kuum "how do you au?",
und was äär denn uff Dytsch ka saage, das verstoot kai Sau!

Der 'Charly' maint ze syynere 'Mum': "S wäär langsam Zyt, I mean,
du muesch mi jetz an d Sunne loo, und zwoor als King, my Queen!"
"No", sait d Königsmamme, "liebe Charly, bisch e Glatte,
mit dääne groosse Oore stoosch e Lääbe lang im Schatte!"