Wägem Gasbrys strytte Russland und d Ukraine.
Es wird verhandlet, aber nooogää will e kaine.
Wäg däne Duble muess denn halb Europa friere
Und wie soll d Gasladärne so no funktioniere?

Schynts muess die reformierti Kirche nimme spaare.
Drum losst me jetzt e aiges Kirchedrämmli faare.
Nur gits ai Fääler wo die Glaubenskischte hett:
Im Glaibasel fäält däm Dramm e Minarett!

Unsri Frau Wänger muess mit 80 no in d Kischte.
Si haig dr Frind vermeebled brichte d Bolyzischte.
Do ka me gsee wie Bottellon grad iber Nacht
uss brave alte Dame beesi Fuurie macht!

Me will bi Autifahrer, so dien d Medie brichte,
uf e Bluettescht jetzt denn gly emool verzichte.
Das wird au langsam Zyt hersch do e Schugger flueche:
Es macht kai Sinn im Alkohol nach Bluet go sueche!

Die Verlängerig vom 8er bis nach Weil
- understütze mir und findes schambar geil.
Das isch e Glanzidee und bringt fir uns ai Gnuss:
Esoo sinn d Schwoobe zoobe schnäller wider duss!

Wenn Eyer Busi oder s Hundeli verändet,
denn wird’s kremiert, und das wo übrig blybt verwändet.
Me macht e Brosche oder Ring us syner Aesche.
Und vo der Gigi Oeri gits denn Läderdäsche!

In Amerika regiert jetzt der Obama.
Jetzt isch der Busch ewägg, das isch fir uns kai Drama.
Jä mir hänn Fraid draa ghaa und s’ isch grad e Vergniege,
wo dämm zem Schluss e Päärli Schueh um d Leffel fliege.

Jetzt het der Hakan wider Raiseluscht bikoo.
Drum het är Bärn in Richtig Oriänt verloo.
Fir uns isch klar, as är deert nid nur wägem Lohn isch:
Mir hänn scho immer gwisst, as är e wieschte Sohn isch.

Jetzt kunnt e Bündner Värs us Länzerhaid Valbella.
Das raimt uhuaraguat uf Daniel Vasella!
De hett im Radio Vatikan sötta verzella.
Scho vor der erschta Sendig hents’na nümme wella!

Syt 15 Joor scho gits jetzt unser Tele Basel.
Scho 10 Joor länger gits em Basilisk sy Gfasel.
60 jäärig worde isch denn no der Knorrli.
Mir maine dä in Aengland, mit de grosse Oorli.