Nit ass i öbbis gege Schwoobe hätti,
s git sicher au bi dääne nätti.
Ellai bim Staat, waartet numme,
het s efang z viil Schwoobe umme.

Dr  CEO Kaufmaa vom Basler EHC,
hät me fascht vierzääh Monet nümme gsee.
Äär haig zem Gligg jo nur bedingt,
nur dr EHC muess gwünne, unbedingt. 

D Barbara Schneider het e Stäärnstund ghaa,
woo si mäldet by de Waale drätt si nümme aa.
Si het e mängge Blatz z Basel verschandlet!
doch daasmool het si richtig ghandlet.

Dr Sabo het wiider dr Plausch am preedige,
äär haig d Lämbbe mit em Koch könne erleedige.
Dr Koch goot als uff Röschänz  iihn go bsueche
no sitze si zämme by Kaffi und Kueche.

Für dr FCB isch s bald e Schand,
wie lauft die Oeri als ummenand.
In dr  Wääbergass kaasch viil soo Goschdüüm gsee,
aaber die hänn nit z due mit em FCB.

Die ganzi Bolizey isch froo,
me het dr Zalunardo, ooni Frischt entloo.
Dr Bolizeydiräggter isch au viil besser  zwääg,
jetz singt er am Moorge, uff em Arbetswääg.

Y haa e Värs kaa vom Yakin iiber Al Gharafa,
scho will äär deert au nimm go schaffa.
Iiber dää due ich mir kai Zahn me ussbysse,
dää kaa mir ändligg jetz in d Kabbe schysse.

Dr Bush lütet dr Swisscom aa,
ob äär d Nummere vom Sämi Schmid könnt haa.
No froggt äär dää: daarf di öbbis haiggels frooge!
Sinn diir au scho Schueh um d Oohre gflooge.

Bym Schnaabelbryys e Noowuggs-Bangg,
vom Maischter sälber, spezielle Dangg.
Dr Namme verooti doo graad au:
D Buscheli vo Wollerau.