Es fremdelet wel z vyyl Schwooben yyne kemme,
wo mit em Hoochdytsch d Stadt iiberschwemme.
Au d CIBA isch jetz schwöbisch - „Doch ich passe mich an“
und haiss drum s nägscht Joor „Hanselmann!“

Dr Roche-Duurm isch bachab als Illusion,
au d MÄSS-2013 isch e Warm-Luftballon,
und was soll das Glas-Gschwüür bim Stadion?
Jetz längt’s denn eppe - Hergott & de Meuron!

S isch wirgglig egal wär me z Bärn oobe wäält,
macht er s Muul uff – merggsch ass s Hirni fäält.
und gäbs emool ain, wo‘s nit duet fääle,
denn kasch sicher syy, dä dät me nid wääle!

Im Ziircher Baanhoof isch‘s em Fäärnsee glunge,
ass d Violetta Traviata drotz Raucher-Lunge,
in iirer Bistro-Arie - bevoor si hoppla goot,
no röchlet: „Doo inn isch joo Rauchverbot!“

Bi däm Cuchepin-Verglyych mit em Mengele,
haut’s dr Möörgeli schier ab em „Stengele.“
Drum wär y gspannt, wie men uff miir dät ummehäggsle,
wenn y dr Murer wurd mit em Mussolini verwäggsle!

D Schwyz wird in Wirgglikait voll krass manipuliert,
und vo 7 Halbschiie und ere Underlibbe regiert.
Und ass em Blocher si Underlibbe no mee fiirestoot,
iebt dä dääglig: „Mueter bring mer e Butterbroot“!

Jeede Moorge mach ych bim Rasiere Grimasse,
um z luege weles Gsicht ze mir wurd basse.
Und denne trainier y, falls me jee iiber mii dät lache,
e son e Schnuure wie dr Leuebärger z mache!

Ooo Barbara - ooo myy Hunger-Düürmli,
du fäälsch miir wie in dr Wurmbiggse s Wüürmli.
Und duesch wyter hungere – do hesch my Grytig,
bisch glyy so dünn wie d Basler-Zytig!

Letschde Herbscht han y - ass bi dr UBS eppis lauft,
s eerscht mool im Lääben Aggzie kauft.
Jetz wo si futsch sin, han‘s yygsee – hols dr Hängger,
y bi kai Invest - Nai – nur Schnitzel-Bängger!

Y bi au ain vo dääne kunschtverruggte Sieche
und gang drum ammen au zem Beyeler uff Rieche,
doch kirzlig han y gstuunt – das hätt y nie dänggt,
ass dr Couchepin scho im Museum hänggt!

Dr Phaabscht griegt vom Galilei e Delifon:
„Willkomme - uff Dim Wääg zrugg - zer Inquisition.“

E ganzi Wuche lang – Sii das isch grüüsli,
hän die uff dr ISS nid kenne uff‘s Hüüsli.
Son e Broblem wurd men im Roothuus lyycht iiberstoo,
dert isch me‘s gwoont dr Saich in lufftleere Ruum uusezloo!

Y bedangg my bi dr SVP fir das Raabe-Plakat,
und fir d Ereffnig vo däm neie Voogelreservat.
Jetz waiss y gnau won y ammen aane flieg,
wenn y wäg dr Calmy-Rey wiider Veegel grieg!

Jetz muess y numme no nyyn mool singe,
denn mecht y my Öögeli in s Museum bringe.
Doch mit däm Fasnachtsmuseum gseets nid guet uus,
drum landets Öörgeli woorschyynts im Broggehuus!

Bim Waldstäärbe han y syynerzyt - ooni z schiniere,
d Fänschter uffgrisse - ass d Baim nid verfriere.
Und  hite loon y – dasch bis jetz seer guet gloffe,
geege d Klimaerwäärmig - dr Yyskaschten offe!