Y ha-n-e Bängger letschti gseh mit Trääne s Blääch poliere.
„Ych verkauf my Bentley“, sait er, „ych due-n-en inseriere.
Und waisch, so richtig fertig macht my jetzt am allermaischte:
Syt me dr Sprit wider zahle kaa, kaa mr dr Kaare nümmi laischte.“

Es git es so-n-e Apparat, dä find ych e Sensation,
wo Wasser macht us Brunz in däre Ruumstation.
E sottigs Gräät ghört uff Afrika, dr Couchepin grad drzue,
bi däm Saich, wo dä uuselosst, hätte alli z dringge gnue.

Mi-, Bi- Trillione - Zahle mit me Siech voll Nulle draa.
Kai Ahnig, wie me sovyl Stutz über Nacht versaue kaa.
Und wenn de schreysch: "Wär isch Schuld?" mit ere riise Wulle,
denn findsch als Antwort noonemol - nur e Huffe Nulle.

Sii, het mii das aber graue, wie saublöd isch das gloffe!
Dä Schueh fliegt eifach nääbedure, het dr Busch nid troffe.
Ych ieb au Schuehwurf, mit me Zyyl, wo an dr Wand duet klääbe,
und sott dr Pabscht uff Basel koo, ych triff denn nid drnääbe!

Dr Bader käschperlet, dr Luzi stämmt, dr Blocher blocht als Alte.
Dr Spueler spuelt, dr Amstutz stützt, dr Walter duet verwalte.
Dr Murer gwünnt, do het dr Brunner „Aadie Christoph“ ghuucht,
und isch syt denn au Kandidat bi dämm "Bauer ledig sucht".

Neu heisst’s „Basler Original“ statt Dääfeli us em Baselbiet.
Das schloot eus Baselbieter halt scho e bitz uf s Gmüet.
Doch ehrlich gseit, mir lyde wäge dämm kei groossi Quale,
well sovyl „Basler Original“ bi eus deu Stüüre zahle.

Das Nilpfärdbuschi us em Zolli miesst stärbe in zwei Johr.
"Hau ab und wird Politigger", flüschtere ych dämm in sy Ohr.
"Bewirb dy als Regierigsroot, die wähle dy villicht,
denn hätt Basel emol e Persönligkeit, e sottigi mit Gwicht."

Falls Du mainsch, dass d Schwoobe sich bi uns vermehre,
muesch wüsse, die kömme numme, well sy doo e Huffe lehre.
Au dr Hitzfäld kunnt vo „drausse“ und muess gly konschtatiere:
Au är duet lehre in dr Schwyz - dä lehrt bi uns verliere.

Noch acht Johr Bush het hütt fascht jede dr  Obama gärn.
Wäg jedem Saich schreyt irgend aine strahlend "Yes we can !".
Au mir Schwyzer hänn e Solgan, dä stmmt vom Sämi Schmid,
drum isch er urchig Bärndütsch, er heisst : „Nei, das chan-y-niid !“

Dr Milchprys singgt ins Bodelose, drum ha-n-y mit Beduure
dr Hof verkauft und uffghört, jetzt duen y nümmi buure.
Jetzt schaff y bi dr UBS, loss my am Schalter vo Kunde quääle.
Au das sinn Kälber, sottig dummi, wo dr Metzger sälber wähle.

Dr dütschi Herr Finanzminischter, die arroganti Nase,
setzt d Schwyz uff die schwarz Lyschte vo de Stür-Oase.
Luegsch vo dr Oase nach Norde, denn seht dy armi Seel:
E wiiderverainigti Wieschti und massehaft Kamel.

Dr Schmid Samuel und sy Armeechef namens Näf Roland
orte hoorgnau s glych Problem, grad baidi mitenand.
Sy sage, dass es bim Militär e tiefi Sinnkryse git.
Jo die Kryse, die seh-n-y au, nur dr Sinn, dä find y nit.

Dr Vasella isch doch nid erwünscht bim Radio Vatikan.
D Pille syg für das dr Grund und nit sy Grössewahn.
Dr Papscht schimpft: „Dä isch überflüssig, Hergott Sakramänt,
bezüglig Macht und Arroganz bi-n-y sälber kompetänt !“

Basel git sich ney mondän, das zaigt sich au bim Schutte.
An dr EURO glänzt die Stadt mit „mehr als 90 Minute“.
In Peking git’s e Vogelnäscht vo Herzog und de Meuron.
Bi uns, do git’s vo däne zwei s St. Jakob-Stadion.
Jetzt fählt nur im Family Corner dr Morin, dä isch au Fan,
wo uffstoht und in d Mängi schreyt: „Let’s go! Yes we can!“