Melodie: I 'll Tell Me Ma …

Daas isch dr Raaser Lambbe Füll,
assozial, wie Sondermüll.
Sufft Red Bull und frisst Party-Drooge.
Wenn äär schwätzt isch alles glooge.
S Bundesgricht het uns ergläärt,
Raaser stroofe haig kai Wäärt.
Aaber waas ääs uns empfähl:
Vergifted si mit Rivella gääl!

Dr Boris Becker het by Fraue,
jeedes Mool dernääbe ghaue.
Kuum verlobt, scho isch s am Ändi.
Tschüss – daas war’s, gilt au fir d Sandy
Woo äär ändlig z Nacht im Bett
d Sunnebrille wägg gleggt het,
wiird äär blaich und macht ai Gschyss:
„Die isch jo blond und erscht no wyss!“

Lueg dää Ueli! Jetzt het s gschällt,
die bescht Armee uff dääre Wält
bikemme miir, wells aifach isch,
ligt au scho d Leesig uff em Disch.
Als Truppechef im VBS
Empfähle miir dr Gilbert Gress.
Dää muess nur Voorne aane stoo
und jeede Gegner rennt dervoo.

D Gigi Oeri duet erglääre:
„Ych bruuch mee Zyt fir d Teddybääre“.
Au d Runzlepflääg , soo sait die Graaie,
zwingt mi in die zwaiti Raaie.
Äänlig deents bym Christian Gross
us de Ferie in Davos.
Äär het s e bitzli anderscht gsait:
“Ych bruuch Entfaltigsmeegligkait.”

Unverschämmti Boni Sippe,
abkiirzt UBS, miir flippe
uus, wenn die vom Waggsdum brichte,
anderscht gsait viil Gäld vernichte.
Dr hailig Boni-fatius
maint die hänn e Schyybe duss
und d Dante Sofie, sunscht e Schiichi,
sait däm Muul - und Klauesiichi.

In Bagdad isch im hooche Booge
dää Schueh doo voor ys aane gflooge.
Lääse kaasch uf syner Soohle:
Hund, dii soll dr Deyfel hoole!
Miir hänn dr Bush nadiirlig gfroggt,
eb die Belaidigung iihn bloggt.
Doo sait äär nur miir duet daas stingge,
dehaime fliege au scho d Fingge.

D Schwyz drybt d Grächtigkait voraa,
dass Bööses nümm verjähre kaa.
Het ain e pädophile Dolgge
kaasch en s Lääbe lang verfolge.
Wenn äär d Schuld nit yygseeh wott
bikunnt äär au no Bruefsverbott .
Doo maint dr Pabscht: „Daas gfallt mer nit,
will s dääwääg kuum no Prieschter git.“

Baasel muess e Bäärgdoorf syy
esoo viil Bäärge git s am Rhyy.
Dr Stainebäärg, dr Minschterbäärg,
dr Kohlebäärg, dr Noodlebäärg,
Aubäärg, Heubäärg, Klosterbäärg,
Stapflebäärg und Spaalebäärg.
Miir hätte no e glaini Bitt,
dass es nie e Carlsbäärg git.

Bivoor miir heeflig Adie saage,
filled Däsche, Gugge, Maage
mit Trüffel, Kaviar, Laggs und Wyy,
miir laade eych nadiirlig yy.
Dängged au an d Schwiigermuetter,
s git bym Haimgoo Drachefuetter.
Kai Brobleem, diir wäärdets gsee,
d Rächnig gooht an d IWB.