Der Beni Turnheer schnuurrt und kaa s fascht nit erwarte,
bis sini Frindin haime kunnt vom Kindergaarte.
Der zwaiti Frielig isch bim Beni in de Gen;
äär kunnt zem glyyche Zytpunggt wie die dritte Zeen.

S bikunnt der FCB vo Kongeli uff d Schnitte.
Vor Wuet isch d Oeri uff em Bääse haimzue gritte.
Si wuurd am liebschte graad e neie Trainer kaufe;
ain wo sich noch so me ne Schämmer d Hoor kaa rauffe.

Der Marcel Ospel kaa schlächt schloofe in der Nacht.
In dääre Zyt het äär zwai neii Buschi gmacht.
Äär hätti gscheiter Schööfli zellt in dääre Zyt;
will au mit zwai Mool Kindergäld kunnt dää nit wyt.

Die scheenschti Zytig vo Europa isch jetz d Baz.
Vor luuter Bildli het der Däggscht bald nimmi Blatz.
Uff Blatz zwai, das isch e baimige Triumpf,
liggt numme ganz knapp gschlaage d Schielerzytig Mumpf.

S Doris Leuthard froggt: „Wäär isch vo uns drei schlängger?“
Do maint der Couchepin: „Und wäär isch vo uns vier grängger?“
Es rieft der Leuenberger: „Rue, jetzt haltet d Glappe!“
Der Merz nimmt s weertlig und foot a noo Suurstoff schnappe.

Scho fuffzää Joor lang macht s Tamara ain uff scheen.
Wenn ääs so wyter macht, denn wird s no telegeen.
An der Miss Basel Waal isch ääs scho richtig froo;
s kaa im Bikiniduurchgang s Trudi Gerschter schloo.

Schaide isch nit wirglig schlimm, es isch vyyl wieschter;
wenn d duesch schaide und denn wirsch druffaabe Prieschter.
Dangg Annuliere kasch au d Rainhait zrugg erlange;
und d Kinder gälte denn als unbefläggt empfange.

Das isch die hailigi Aifaltigkeit s duet schogge;
wenn im Byychtstuel nundedie der Ex duet hogge.
Die armi Frau wo n äär losst sitze voller Wonne;
kaa jo in s Kloschter als alleinerziehendi Nonne

Es rieft der Malama z Bäärn uss em Kindersitzli:
„Ich bi no doo und reed e jeede Daag e bitzli.“
Stoot äär am Reednerpult und schwätzt deert ganz heroisch;
gseesch gaar nit ob dä glaini Zwuggel au no do isch.

Buur suecht Büürin fir uff s Fäld und fir in Stall;
mit Grafft zem Schaffe, scheen und schlangg und oobe prall.
Wenn s goot e Gscheiti und s Modäll mit blonde Hoor
und am liebschte au mit aigenem Draggdoor.

Es sinn der Szabo und der Koch sich nimmi Find.
Jetzt sait der Koch zem Szabo wiider: „Liebe Frind.“
Der Ratzi z Rom isch froo und macht e diefe Schnuufer:
„Jetzt sinn die wiider, s isch so scheen, am gliiche n Uufer.“

Mir hänn am Barfi gwaartet uff eso n e Tango.
Es isch kai Underschiid zue sunscht s duet aifach lang goo.
Noo vier Stunde isch denn ändlig aine koo;
grad gliich lang hänn mir bruucht zem s Byyljee uuseloo.

Der Bresidänt in USA isch nimmi wiss.
Um die exotischi Miss Schweiz do git s e Gschiss.
Wenn das so witer goot hänn mir analysiert;
isch der näggschti Pabst woorschyynlig reformiert