Wo der Baschi z Buebedorf elai,
im Stadion singt: „chum bring en hei…“
het s Team vom nyynte Stadion, das all zue weertlig gnoo,
und die zwai Fään, wo doch no koo sin, wiider haime doo.

An der Euro isch es sauguet gloffe,
gege d Tirke isch is kain versoffe.
Fascht jede het e Balle gsee - nur ain het wee am Bai,
der Alain Sutter sait worum - denn sin si wiider hai.

Am Fäärnsee als - dä Allain Sutter,
äär isch zwoor e grosse Schutter…
… gsii vor Joore, doch no dis no, miest ych en nimm derby ha.
Y stell mer s Draumbaar eender vor als: Turnherr und Mike Shiva….

Was het ächt der lieb Gott dänggt
wo der Littmaa Lümpen aanehänggt?
Wott me dääwääg das verstegge - was unseri Baudeppe verblaane?
No gheerten aber, so unter uns, gresseri Diecher aane.

Wenn Bangge wangge will si grangge,
no zittere si um jede Frangge.
S Vertraue syyg halt nimme do – kein griegt vom andere Gält.
In Ganovekreise kennt me sich… jä so glai isch d Wält!

Der WWF brichtet:  „bi der Mittlere Brugg
gieng em Morin sy Gletscher alarmierend zrugg!“
Är zaigt ys dert, dass Yys verlauft, isch das nit paradox?
Fir das nimm ych, so unter uns, e Whisky “on the Rocks”.

Bi Huusdier daarfsch nimm schalte und walte.
Die Viicher muesch jetz “artgrächt“ halte.
Es dangges alli Hamschter, Goldfisch, Büüsi gottergääbe.
und der Sämi Schmid schepft Hoffnig uf e hundewürdig Lääbe.

Der Couchepin het’s im hooche Booge,
in sone schwarzes CERN-Loch zooge.
Doch denn isch alles abvereggt, was sell y lang verzelle,
dä isch wiider fiirekoo: ...das Loch het en nit welle.

D UBS het e nei Gschäft entdeggt.
Ains wo nimm alles abvereggt.
Me spiilt in iire Schalterhalle Roulette und Black Jack.
Denn saage sy:  „rien ne va plus“  …und  ubs,  di Stutz isch wägg.

Bi de Bangge waiss me nie so rächt,
bisch derte Keenig oder Gnächt.
Nur naime kaasch der sicher sy, nämmlig dass dä Disch,
wo si di grad driiberzien, us Mahagoni isch.

Dass der Sämi goot - daas isch s Guete,
s Schlächte isch: s git Naasebluete!
„Wenn das bi jedem Ruggtritt isch“ - bedänggt d Frau Calmy-Rey -
„denn git’s bim Couchepin - mit sym Zingge - e Riise-Sauerey.“

Der Rotscher ziet wie Anderi au,
vo Basel wägg uf Wollerau.
Sythäär längt s maischtens nimm zem Siig – isch das nit veruggt?
Do gseesch wie sone Umfäld halt brutaal uf d Laischtig druggt.

Im Iran erschyynt s Micheline gedige,
wie em Aladin synere Lampe entstiige.
Und wo si wiider haime kunnt – maint der Couchepin zimmlig muff:
“Das Gaischt muss retour in das Flasch – und isch mach Zapfe druff.“

Unsere Ueli – scho rain optisch gsee,
isch e grosse Gliggsfall fir d Armee.
Jetz none Schnauz iber die Zeen – und scho -  ai ai ai ai ai
hän mer daas, wo s derte dringend bruucht:  dr Läppli Nummere zwai!

Sit der Blocher nimme prediget    .… het sich au daas erlediget!