Dä Nef wär scho e stargge Maa,
wo diArmee au fiere kaa,
denn wie me sich erfolgryych wehrt,
hett är vo de Fraue gleehrt.

Nit nur d Raucher hänns jetzt schwäär,
d Aeschebächer blybe läär,
au als Gourmet kasch s glatt vergässe,
in e Baiz go Rauchlaggs ässe.

Dr Boopscht dä gläubig Maa,
hett maischtens e raryssi Robe aa,
sobald aber d Sunne druff duet flimmere,
wurd e Bruundoon duure schimmere.

Dr Schöllkopf hett e Brunne kauft,
und Schneidere die haig en dauft,
wo soo vyyl Prominänti "rüssle",
gits no gäärn e Sprung in "d Schüssle".

No em drugg vo de Journalischte,
verzichtet dr Ospel ut 22 Kischte,
es syg in Zuekunft sy besträäbe,
numme vom Kindergäld no z lääbe.

E paar FCZ Fans mache sich verhasst,
drum hett dr Club 2 Gaischterspiel gfasst,
fir Ziircher isch die Stroof nit sträng,
die schutte jo immer vor leere Räng.

E Moolermaischter mit zwai Maa,
mäldet sich bim Obama aa,
bis jetzt haig jede, wo dä Job hett gfasst,
scho optisch zue dr Villa passt.

D Radprofi kenne sich di Maischte,
s Dringge schynbar nimme laischte,
y find die Entwigglig gar nit guet,
e huffe suffe scho aigene Bluet.

D Frau Müller, Wyss, Abt und Hauser,
Sutter, Zaugg, Ballmer, Glauser,
typischi Schwyzernämme, s isch gspunne,
aber no kaini hett e Misswahl gwunne.

Dr Sämi Schmid,dä nimmt dr Huet,
au dr Ueli Muurer syg nit guet,
är isch am Schluss no fiibrig blyybe,
aber d Hauptsach, es sinn wider Siibe.

Wo ni ghört ha, dr Bund kauft Altlaschte zrugg,
ha ych mir gsait, kumm gib dir e Rugg,
was e Grossbangg ka, kasch du doch au,
sythär lääb ych gligglig ohni Frau.