D’Bolizei verhaftet dr Ghadaffi.
Dr Bappe fiert als Reaktion e Straff ii
Fir alli Schwyzer, wo
Nach Lybie syy ko.
Mir dängge is: Was muess das fir en Aff syy?

Die Gschicht wird pletzlig interessant firs EDA.
Mit Swisshansa duet d’Micheline anejetta.
Mit Kopftuech um dr Hals,
De Fundi-Männer gfallt’s,
Mecht si mit Gegegschäftli alles retta.

Doch Bärn sait drotz em Äärd-Eel heeflig: «Nai Si!
So Kuehandel git’s nit emool dehaim, Si!
Die hett doch numme glacht
Und scheeni Auge gmacht,
Will d’Calmy-Rey nimm mechti so elai sy.»

D’Folg dervo – hän mir miese erfara -
Isch, dass mir mien bim Benzinkauf spara.
Und in drei Joor, i-wett
Mit dir um e Minarett,
Wird sogar dr Schumi Velofara.

---

Obama and I – Obama no cry

Jo äar kaa – Obamania. Wie wirsch gwäält mit somne Nama?
Tschuld an däm Nama isch nur sini Mama
Barack Husseins lande sunscht als in Guantana – mo

Obama isch nit dr Malama. Dr Malama isch nit Obma.
Obamalama wär super fir dr Eyma. Denn dr Eyma setti no ne guete Ma ha.
Obma Obama oni Eymalama. Jetzt isch aine dra, wo sait: Jo, I ka!

Obama and I – Kum bring en hei.

---

Stilli Waal, gar kai Waal.
D’ Herzog will nur, das-i Styyre zaal.

Eymaa, Conti und Gass zaige aa,
Dass me e rootgrieni Meerhait wett haa.

Nur dr Morin, dä Grieni, dä will.
Usser Welle, ka dä nit vyyl.

---

Mir hän kai Aanig vo Subprime und so.
Cäsh Flow kenne mir nit verstoo
So änglisch Usdrygg hän mir nie richtig gheert,
Weil mir im Kindsgi haben Hauchdyttsch geleert.

Mir wisse nit rächt was e Hedge Fund isch.
E Business Plan isch bi uns kain uff em Disch.
Aber fir d’UBS längt’s schyynts no lang.

Optioneschegg -
Dasch das, won-i drum eebe nit tschegg.
Risk Mänidschmänt isch,
Wenn me die rächte Lyt kennt

Wenn de merksch, dass wirggli gar nyt goot.
Und sogar d’CS maint: «Fir di isch’s z’poot»
Wirsch PR-Chef fir dr Vatikan.

Sensibilis nullis.
Habemus problemus
Mit papa razzibus.
A-a-a-a-ändschtreich.

---

Evi Widmer Schlumpf
Du bisch dr nei Stäärn im Bundeshuus.
Du gsesch guet uss und kunnsch au druss,
Wie me ai Departemänt fiert – oder zwai.

Du dyschlisch per Express
S’Bangg-Ghaiminis fir Guantanamo.
Uff die Idee muesch au erscht ko.
Dyy Härz blyybt fit trotz Stress mit UBS.

Wennd aaziehsch s’ Asylantegsetz
Erligge’s alli, sogar d’Fetz
Du bisch dr nei Scheff und gege di
Isch dr Blocher e lingge Softie gsy.

---

Im Bundeshuus wird wieder «gwäält».
Uns hett dr Blocher eh nid gfäält.
1-2-2, es isch fatal,
Längt em Muurer fir sy Waal.

D’Vorgschicht isch e laidi Sach.
Dr Meergeli macht zerscht mol «Krach».
Zum Gligg schafft är’s lebändig druss,
Sunsch geen is no die Rächte uss.

Und dusse vor em Bundeshuus
Singt’s Militär dr Abtrittsblues.

Skandaal – Ums Abgangsgäld.
Skandaal – Wär hett dä g’wäält?
Skandaal um Rolli

Dr Näf, das isch e Maa vo Wält,
Wo oft die glyychi Nummre wäält.
Mir mergge: S’bruucht drum sone Dotsch
Wenn d‘Armee abschaffe wottsch.

Und dinne schlooft im Bundeshuus
E Schnauz, wo sait: «Chumme nit druus.»

Skandaal – Um Gallestai.
Skandaal – Jetzt deerf äär hai.
Skandaal um Sämi.

---

I-ha vo Gäldsache kai Aanig
Und jede Daag Laggs uf em Disch
Wirtschaftskriise isch für mi
Wenn in dr Stadt kai Baiz off isch.

Wenn uf Island Konte gfriere
Wird’s fir mi erscht richtig faiss.
Due mi denn e bitz scheniere,
Dass-i Marcel Ospel haiss.

I bi mit Stolz e Mylioonär,
Gib myyni Boni nimme här.
Numme Styyre bläch-i gärn.
Denn mini Bangg wird zaalt vo Bärn.
Nur eins git’s, won-i lieber wär:
Populär.

---

Zää Bottellionistas finde sich am Barfi ii
Es kemme numme nyyn dehär, ein isch scho sächzää gsy.

Acht Dollar koschtets z’Kongo fir e Seggli Ryys im Schrangg
Fir siibe fillsch mit Bio-Diesel grad dr ganzi Tangg.

Säggs Stutz zaalsch fir e Zigerette, wo nid moll deerf aa syy.
Fir finf bikunnsch e Schnitzelbroot mit Flaisch vo däm Farasi.

Vier Wuche lang hän d‘Bäänler gschtreiggt und allne zaigt, wie’s goot
Dasch drei Wuche schnäller as dr Cisalpino z’spoot.

Und denn wär no die Gschicht us China vo zwai arme Knilch
Si sin zum Dood verurteilt gsy mit je aim Liter Milch.

Dä säggsti Värs beschliesst die schlächte News mit klarem Zwägg:
Wenn’s CERN wieder zum Laufe kunnt, denn sinn mir alli wäg.

---

Glossaar:
Medieplan – E Unwort im Vatikaan
Vasella – E Verhietigsmittel. So äänlig wie Rivella.
Tangotram – au uf das wartisch lang
S’nyynte Stadion – en Ort vo der Meditation
Meergeli (SVP) – Dä hett dr Kaschtewaage nid gsee.