Hesch Du scho moll e Dinnpfiff gha – mit Grämpf, so richtig fescht?
Banaane, Schoggi hälffe nyt, au Zwyybagg isch nit s bescht.
Kasch oobe n yyne loo, was d wotsch – s laufft uuse – s isch e Stress!
Ass das au mit Milliarde goot, gseesch an dr UBS.

Lugano, Olte, Langethal, La Chaux-de-Fonds, Kloote, Bäärn;
Zug, Ambri-Piotta, Neuchâtel, Sierre-Anniviers, Luzäärn,
Davos, Biel-Bienne, Chur, Martigny, Visp, Lausanne, Genf-Servette:
Git s ebber, wo der EHC e Huuch vo Chance het?

In Ziiri wänn sy jetz – per Gsetz! – die Pitbull-Kampfhind nimm,
Die Kleffer-fletsch-fletsch-um-sich-Bysser sinn jo wirgglig schlimm.
Wirsch gsee, ass jeede schaarfe Hund jetz Ziiri bald verloot.
Kai Wunder hoggt dr Muurer scho in Bäärn im Bundesroot.

Dr Nationalroot Mörgeli, dä raast – s isch wirgglig schlimm –
Graad in e Liiferwäägeli – worum, das waiss är nimm.
Het d Sunne bländet? S Händy gschällt? Was keent s emänt no syy?
Jä, uns isch klaar: Dr Mörgeli, dä kaa nit linggs verbyy.

Griegsch bi dr Bangg no ai Prozänt, denn luegsch scho häppy dryy.
Bi'r UBS hesch null Prozänt – und muesch no zfriide syy.
Wenn du dy Gäld eso aaleggsch, bisch pleite zletschtamänt.
De kauffsch vyyl gescheiter Beaujolais – mit sicher zwelf Prozänt.

«Dr Blocher isch dr Beschti gsii – e super Bundesroot!
Ych butz scho lang im Bundeshuus, dää het mir zaigt, wie s goot.
Fiir dää ha n ych am liebschte gschafft – denn het s mir, jesses joo,
Bim Schreddere vo Ghaimpapyyr dr Ärmel yyne gno.»

Das Mätschli geege Barcelona – kuum isch das verbyy,
Do riefft dr Streller: «He, Amigos, tauschen Lyybli yy?»
Är het die Lyybli ussbrobiert: Barça grandios!
Nur basst het kains, au d Lyybli sinn jo zwai, drei Numm're z gross.

«Hände hoch – an Boode liige – mache Sy kai Gschyss!»
Das rieft e Typ ins Stuubezimmer – d Frau wird kryydewyss.
Dr Spaarstrumpf, dä isch jetz ewägg – do hilft kai Hund, wo bällt.
S isch druurig, aber nur no soo kunnt d UBS zue Gält.

Mir alli hänn das alte Baasler Drämli schampar gäärn.
Das Drämli – Drämli – Drämli gfallt de Lyt vo nooch und fäärn.
Die Dante Schuggi isch robuscht, sy laufft und laufft und laufft.
Nur d SBB het gopfriidstutz dä Tsch-Tsch-Tschyssalpino kaufft.

Grad geschter hänn ys d Kinder gfroggt: Spiilsch au «Verkeerti Wält»?
Das Spiil goot soo: S Wort Fisch haisst Hoor und Hoor, die haisse Zält.
Saisch aber Zält, denn maint me Huus und Huus bedyttet Disch.
Mit Disch isch gmaint e Delifoon und Delifoon haisst Fisch.
Im Kopf bikunnsch e Wiirlete, wo draait und ummekraist.
Jä, s Ainzig, wo n ys bliibe n isch: ass Christoph Ueli haisst.

S Aenishänslis sinn besorgt: S goot iire liebe Soon
Zem erschte Mool mit syne Frind an so n e Bottellion.
Was isch, wenn är zvyyl Wodka sufft und denn so gruusig stinggt?
Dasch doch nit halb so schlimm, wie wenn är Milch uss China dringgt.

Dr erschti Laggs noch fuffzig Joor schwimmt z Basel in mym Rhyy.
Jä, das mues ganz e gscheite Fisch, e Super-Hiirni syy.
Dä het drum gmerggt: Mi frisst doch kain, ych trau my ganz elai,
He jo, s woont jetz in Wollerau dr schlimmschti Bangge-Hai.

Jä merci vyylmool, schampar nätt – und danggscheen, jodrnoo.
Mir fraie n ys, wie uffmerggsam, sinn Sii scho wider doo.
So nätt deent s bi dr UBS, wenn mir an Schalter wänn.
Mir drei sinn drumm die allerletschte Kunde, wo sy hänn.