Der Cuche – do dä Metzger – trainiert 17 Joor,
no raast är z Val d'Isère als Maischter duur d Door.
17 Joor grampfe – i stuun ab däm Maa,
Do kenntsch au bim Couchepin no Hoffnige haa.

D „Surprise“ Verkaiffer, die jagt me dervoo,
am Bahnhof daarfsch nur no mit Blagette stoo.
In ere Zyt wo d nur schlächts heersch do wärs doch no tschent,
wenn eppedie aine „Surprise“ rieffe kennt.

Bi Bundesrootswaale han ich als frei gnoo,
denn – wuurdes mi weele – no kennt i grad goo,
I machs jetz dängg nimmi – nai Sii , s wär jo glacht,
wenn i see was fir Begg me zum Gäärtner macht.

Mi Bueb isch halblääbig, und s wiird em als schlächt,
dä het wäg em Eymaa jetz schlooffloosi Nächt.
I haan en denn dreeschtet und gsait : waisch i wett,
der Eymaa  goot au mit de Hiener ins Bett.

S Blakaat mit de Graaie git vyyl beeses Gschwätz,
sogar d Voogelwaarte het ussgriefft wie lätz.
Statt z schimpfe sott me gscheiter die SVP Heere,
mit all iire Veegel in e Volière speere.

D Wirtschaft am Ranze, d Bangsioonskasse läär,
und all die Bschysskaibe dien wie wenn nyt wäär.
Me losst si lo lauffe, e Gsetz gääbs do kains,
Worum denn verdeggel geg s Rauche so ains.

My Klärli het Schiss – sy will nimmi uf Gämf,
Si findet s schwaarz Loch do vom CERN syyg e Sämf.
S kenn alles verschlugge, no haig me der Drägg.
Das mache scho d Bangge - der Stutz isch ewägg.

Der Boopscht isch e Dytsche – y schriib em e Brieff,
loos Benne due bätte, do laufft eppis schieff !
I due mi vernaige,  mach de Bäänler jetz Bai !
Suscht kummi mit däm Schysszuug vo Mailand nimm hai.

Der Boopscht het mer gschriibe – är haig mi vermisst,
ass z Mailand e Zuug gääb – das haig är nit gwisst.
Är suech no e Bischoff – är hätt e Pfaarei
Und bim Raadio do wäri grad au eppis frei.

Meer  als  nyynzig Minute isch Baasel – hesch s tscheggt,
wenn’s ganz Imbergässli wie ai Brunzhuus schmeggt.
D EM isch umme und Fans sinn dehai
Und mir mit em Schyssdrägg und em Eymaa elai.

I froog nit worum goot der Chef vo der Schmiir,
kaa do nit der Gass ächt no vyyl mee derfiir.
I froog nit worum macht der Näf so ne Saich,
dänggt dä nur ans Pfyffli und luegt ass är braich.
I froog nit worum stäärbe z Kyna die Kind,
worum heersch do nyt mee, s goot alles so gschwind.
I froog nit worum au, sinn d Staate banggrott,
worum mache d Bängger numme no  Schrott,
I froog nit worum läbt hitt alles uff Bump,
worum sott me  zaale – das wär jo rächt plump.
I froog nit worum, gits dä Grach wäg em Gas,
s friert alles an Ranze, wo isch do no s Mass ?
I froog nit worum legt me Gaza in Schutt,
Worum bombt me Fraue und Kinder kabutt.
I froog nit worum kemme d Lyt mit de Boot,
und mechte nit vyyl - nur ewägg vo der Noot.
I froog nit worum filzt e Pirat so e Schiff,
wär het doo no waas - und waas nit ganz im Griff.

I froog nit worum – suscht verlosst mi der Muet,
drum saag i jetz aadie – und machets no guet.