S wird als wie wermer uf dr Wält, drum wird’s im Winter kelter
Dr Mentsch blybt länger jung und dorum wird er als wie elter
S git 20 Giga groossi winzig gleini Speicher Kaarte
Und Boni wo’s schynz gar nit git, die koschte zwei Milliarde.

Die Däfeli us Rahm erhitze d Baselbieter Gmieter:
D Frau Blocher nennt sy nur no "Rahm" und nimme "Baselbieter".
Em Benedikt vo Rom verdirbt das nit die gueti Luun;
Unfählbar het är sofort gsproche: S Wichtig dra isch s Bruun.

Dr Putin und sy Nochbere, die mit em Zopf am Kopf,
Die mache zmitts im Winter in dä Schluuch fir s Gas e Knopf.
Die Kryse het dr Bundesroot nit bloggt und kenne raize .
Är waiss: Me ka dr Ofe au mit ghaime Akte haize !

S hän d Fraue in dr Mode gfunde: Jetz isch s Zaige Trumpf !
Si zaige ys die diggschte Schaiche bis an Rumpf im Strumpf.
So ka me s prall und knaggig gseh vo vorne und vo hinde –
Kai Wunder kasch kai Hülle me fir unseri Klepfer finde !

Die aarme Granggekasse hän im Spaarstrumpf schyynz Loch
Drum miese d Prämie leider wyterstyyge noch und noch
Jetz mues ich, zum die Prämie wyterzaale, kame’s fasse?
E Niere uf e Schwarzmäärt gä – und d Opration zaalt d Kasse.

Em Landesvatter Merz sy Härz het nimme welle tigge
Si hän em s aber gligglig mit vyl Schlychli kenne fligge.
Nur laider isch, wo d Yankee jetz uf s Banggeghaimnis knalle
Die scheeni gfliggti Pumpi no in d Hose abe gfalle.

Als Banker isch dr Marcel Ospel klar e raini Niete;
Kai Kaigelclub wurd däm no s Raisekässli gä zem Hiete.
Doch so, wien är fir Noochwuchs sorgt mit jeder neje Frau,
Wird dä no vyl Erfolg ha an dr nägschte Rammlerschau.

Wo äntlig dr Obama kunnt als neje Presidänt,
Sin alli, wo no feschte kenne, tagelang presänt.
Nur ebbis ka no greesser sy und tyrer und perfäggter:
Das isch bi uns d Entsorgig gsi vom IWB-Dyräggter !