Abdailig Bangge

Ych haiss Spitzbueb, und bi n e Bangg.
Die Kombination macht mi das Joor no grangg.
Ych ha euer Gäld nid gstoole.
Das mien dr bi m e andre Spitzbueb go hoole.

Ych haiss Spitzbueb, und bi n e Bangg.
Aigentlig macht mi das doch nid so grangg:
Wenn y hitte schlächt bii, vorwärts Marsch,
schiebt mir dr Bund morn Gäld in Arsch.

Vo aim UBS-Aagstellte bi n y denn Fään.
Genau: Ych main dr Hämmering-Mään.
Im 2008 het, in dr Summe,
syy Börseprognose am beschte gstumme.

Y ha do e Spaarsau, s Gäld isch duss.
Y stell se n an Ussgang, do voruss,
im Fall ass no ebber, ganz haimlig und still,
hit zoobe sy Bonus zruggzaale will.

Abdailig Baasel

Aigentlig käämt jetz e sauglatte Värs:
Ain iber Intoleranti wär s!
No lache dr am Schluss no z lut, o jee;
Und denn reglamiert dr Roger Thiriet.

Y ha am Morgestraich dr Streller droffe.
D Drääne sinn em aabegloffe.
Er lauf am vieri iber die Middler Brugg,
do haige n alli pfiffe, also jetzt dritt er zrugg!

D Baasler Protestante fiere
e Drämmli jetzt zem Missioniere.
Bi Hailiggaischt, Don Bosco, Claare,
wird ooni Halte duuregfaare.

Nodyyrlig wänn jetzt au d Kadoole
fiir iiri Zwägg e Drämmli hoole.
Sii, das wäär no guet zem spaare,
die leen aim sicher schwarz lo faare.

Und hindedryy denn d Islamischte
wänn au e so n e grieni Kischte.
Die dien denn s Drämmli, das git z brichte,
all drei Stund geege Mekka richte.

Abdailig Internationaal

Dr Benediggt preedigt de Bischöff in Rom
geege Schwuuli, vor Wienacht im Petersdom;
denn hänn sy dr Weirauchkessel gschwunge,
und ganz lut „Ihr Kinderlein, kommet!“ gsunge.

In de n USA, s isch laider woor,
isch s wider wie vor 150 Joor;
wie ze Sklavezyte, diend ech schämme:
Dr Wyssi het dr Drägg gmacht, und dr Nääger ruumts jetzt zämme!

S schiesst ain, und alli luege zue,
uff e Busch e Bäärli Schue.
Nei’i Schue! Ych ha mr dänggt:
Do hät doch au e Baggstai glänggt!

Dr Haider und dr Mörgeli
hänn bim Autifaare Sörgeli.
Als Vordail kasch bim Haider orte:
Er isch e bitzli rueiger worde.

Abdailig Schwyz

Dr Armee-Chef Nef het nach syn’re Affääre
jetzt e Job bi s Gaddaffis, um deene z erklääre,
wie me bi uns, will das waiss er guet,
Fraue strooff-frei beleschtige duet.

E Dotsch, e bleede Siech, e Glunggi und e Siirmel,
hänn mitenander Grach ghaa, e riise grosses Gschtiirm, well
der Glunggi het zum Dotsch gsait, er syg e bleede Siech,
und dää isch grad zem Siirmel grennt, was au nid jeede miech.

Und er het em das verzellt und gsait, der Glunggi syg e Dotsch,
und der Siirmel hets em Glunggi gsait, was de halt nid sotsch,
dää het s em bleede Siech grätscht, dä het nyt iberlait,
er het zem Siirmel „Siirmel“ gsait, was sälle nid verdrait.

Und er haut em bleede Siech grad ains um d Oore das es tschättered,
dr Glunggi lauft derzue, und gryfft jetz au no yy und wättered.
So hänn si ai Joor gstritte, vo friee bis zoobe spoot,
- bis dr Glunggi zruggtritt – und dr Dotsch wird Bundesroot.