Dr Max vo Augscht im Opeli
spiilt z Aesch bim Ruth Monopoly.
Sy boschte Stedt vo Chur bis Gänf, nur z Basel dien sy basse,
us luter Angscht sy kääme bim Theater no an d Kasse.

Im Spittel gspüürt dr Merz am Härz
dank Bypäss nid dr gringschti Schmärz.
Druf zaigt em d Schweschter Esther d Kuurve mit em Börsefieber.
Do rieft er lyycht verdutzt: zrugg ins Kooma wäär mer lieber!

Dr Streller klagt de Paparazzi,
me pfyff en us - är pfyff uf d Nazi.
Är haig e super Aagebot, drum wäggsler Shirt und Höösli
und stüürm jetz vorne rächts näb em Häbsen im Mimösli.

Jetzt trägt das Micheline im Iran
den Schleier wie ein Taliban,
stöhnt dr Pascal, Ans-Rodolphe, wir müssen voll vermeiden,
dass es sich lässt in Afrika noch rituell beschneiden.

Uf Ebay wird d Armee aabotte,
samt Tiger, Panzer, Gwehr und Motte.
Das alles goht für dryssig Stutz, zahlbar in drei Raate,
guet verpackt per Schiff zu de somalische Pyraate.

An dr Euro rieft ain froh: sans griesst,
i hoff, dass Öschtreich Tore schiesst!
Zaghaft schüttlen yych dr Kopf: mein Freund, das glaub ich nie.
Mit den Schuhen, wo ihr schuttet, fährt man nämlich Schyy!

Dr Maurer längt dr Widmer-Schlumpf
im Bundeshuus verliebt an Strumpf.
D Frau Widmer-Schlumpf mäint zimmli dumpf, si könni für nüt büürge,
dä käämi allwäg nuur so nööch, dass är se könn verwüürge.

Käi Lüftli goht in dääre Nacht.
Dr Vollmond stoht, e Stäärnli lacht.
Voll Gnuss hän s Fridlis duss zum Schluss no ne Cüpli gnoo.
In däm Momänt isch s Fluugi denn halt glyych vo Süüde koo.

Dr Schwyzer Karli und dr Faes
lehre, was sich ryymt uf Kääs.
D Uni stellt die Glehrten aa - für d Fasnacht ischs e Gschängg.
Glyy bruchsch zum Singe dängg dr Master of the Schnitzelbängg.

Schuemächerli, was koschte d Schue?
Gits au Neegeli derzue?
Schuemächerli, Schuemächerli, d IWB zelle d Gescht.
Gäll, mit myne gflickte Sohle schaff ichs nid an s Fescht?

Im St. Johann trifft znacht e Dachs
Am Ryybord uf e zruggkehrt Lachs.
Fischli, in däm Schlamm do bisch nid sicher, höörsch en zische,
will die vom Staatsschutz schampar gäärn im Triebe Fiche fische.

Dr Guschti Stutz fluecht vor sym Humpe
und löscht im Bruune Mutz dr Stumpe.
Dr Bischof Koch in Solothurn macht au e Höllegschrei.
Für syy Rauch, dr Wyyrauch, gits e Fumoir: d Sakrischtei.

Die partnerschaftlig Geriatrie
vo Zwick und Conti lüüchtet yy.
Doch gschyyder wäär bim Bruederholz, maint e bekannte Kritiker,
e gschlosses Spittel - für demänti Stadt- und Land-Politiker.

Blocher, Ospel, Nef, Sloczower,
dr Schmid im griene Tarnpullover
leutsche znacht uf Leutschenbach zum Epinay - früsch gstrählt,
denn ains vo däne Bürschtli wird zum Top Swiss Würschtli gwählt.

Dr Michael Jackson trait e Weschtli
am fufzigschte Geburtstagsfeschtli.
I find de Aalass, ehrlig gsait, scho ne bitzli haikel.
Fufzgi si jo höggschtens ai, zwai Taili vo däm Maikel.

Z Tuusige, mit Zoggeli,
in Orange, s Muul voll Schoggeli
schluurfe si zum Joggeli - berueigt maint do d Frau Sarasy:
Stroossewischer hets glaub gnueg, nur bi de Bääse spaare sy!

De laatst rjjm nog eens voor de goede vriends van Nederlands:
In holzpantoffeln stoffelnz van de Grachten te de Rjin,
lachen, daz de balken krachen om Pfalz en Rümelin,
van kop te voet oranje, een paar bekijft van gras,
de muul vol bier en läckerli en Edamer kaas.
De Russen zjin straks dussen, de fans in trance posunen,
terwijl ze door de Steinen slurben - en de Zwitzsers stunen.
Met tulpen en met stulpen tschalpenz in de stadioon,
toch snel is kopfertekkel sluzz met de oranje droom.
Ruud van Nistelroy kruicht uf de kneu and Van der Sar
klopt de handschoen uis – de waare star is klaar.
Olé, qué tensión, y pasión - y sensación,
caramba, carajo, cazpacho, viva Espagna: botellón!