Grad nach em Znacht do goot der Hansli gschwind ins Bett,
au wenn er none riise Byygi Uffzgi het,
und sait zem Babbe: „Will y frieh go pfuuse muess,
hoggsch du jetz draa und machsch dä Saich, sunscht griegsch e Buess!“

Jä s Evi Widmer-Schlumpf het jo dä Bryys do gwunne,
drum schyynt für sii jetz nach em Rääge wider d Sunne.
Am Stammdisch rieft ain, vor em Fäärnsee, quer duur d Baiz:
„Jo aso, daas Joor gfallt s mer nit, die ney Miss Schweiz!“

„Ey hesch e Stutz, odr so, ey waisch für öbbis z Ässe,
ha grad e Loch, waisch, ha drum s Boortmenee vergässe.
Ey danggschöön gäll, un no ne schööne, odr so!“
Das isch der Ospel z Wollerau inkognito.

E baar Milliarde het der Bundesroot spendiert,
do hämmer au sone Finanzpakeet denn gschniert
und hän unsri Wäärtpapyyr - do bruuchts e glüggligs Händli -
als Bündel gnoo und uusegstellt an s Stroosserändli.

Miir inveschtiere jetz in unre Schreebergaarte,
bis d döört kasch äärnte, muesch Geduld haa und halt waarte.
Dangg gsunde Waggstumsraate, wo d Natur duet spände,
kunnsch mit Andyyvy denn an dyyny Dividände.

Die maischte Schnuuderi, wo do so d Wänd verschmiire,
die hän e Kappen aa und aini uff der Biire.
Wenn die dervoo mien seggle, hän sy immer Mie,
die sotte voorhäär halt no d Hoose uffezie!

„Ame schöne Mörgeli het für mych die Fahrt ganz blötzlech gändet,
bim Blick in Spiegel zrück han ych mych sälber bländet.
s git Lüüt, die säget ych heb en Schade jetz, das stimmt doch äfach niid,
denn - wüsset sy - zu vorheer merken ych kän Unterschiid.“ 

E riisen Ai het do der Ratzi letschti gleggt.
Dä het glaub aifach zvill am lätze Weihrauch schmeggt.
Sy hänn en brämse miesse und in Sänggel stelle,
sogar der Haider haig er hailig spräche welle.