D Rosch plaant z erscht e grosse Turm,
elegant und gschwunge, wien e Wurm.
Doch bletzlig sott dä nimme koo.
Y ha sy gfroggt, worum, wieso?
Sy haige Angscht, das isch verruggt,
dass dr Rankofpalascht dä Turm verdruggt.

In dr  Armee, do hetts jetzt Lugge.
Z erscht duet dr Knutti sich verdrugge.
Au dr Nef isch nit dä Maa,
uff dä me blind vertraue kaa.
Jetz kunnt dr beschti allem aa,
dr Oberscht Peter Malamaa!

Hösch Migger, dert schlycht e Dieb dervo!
Kumm mer seggle n em hindenoo!
E Raiberjagd, was gisch, was hesch.
Doch luege die Schugger bleed ind Wesch.
Dä Maa do het nit wirgglig gstoole,
dä isch bi dr UBS gsii, go sy Bonus hoole!

Kennsch d’Schnydergass und d’Gärbergass,
d Stadhuus- oder d Stänzlergass,
au d Gryffe- d Laye- d Wäbergass,
vo dr Rhyygass, bis zuer Spiegelgass,
do segglet unsere Hanspi Gass,
vo Gläbbergass zue Gläbbergass!

D Calmi Rey wott d Pirate-jaage,
dr Murer kaa das nit vertraage.
Dr Merz git s Gäld dr UBS,
dr  Couchepin wingt nur ab, im Stress.
Das Ganze kunnt mir, s isch doch woor
Wie 20 Joor Häbse-Theater vor.

Das grosse Theater ums Rauchverbott,
isch ebbis wo e kaine wott.
Es isch e Schlaag fir alli Wirt,
dass s Rauche zem Verbräche wird.
Am e scheene Daag do kennts dy braiche,
dass d nit emool me darfsch go saiche!

D Frau Öri isch nit ächt d Frau Öri,
si isch halt numme d Frau vom Öri!
Iire Spraach die kommt vo wait.
Das heersch graad, wenn si ebbis sait.
Au an dr Huutfarb gseesch es gly,
si kennt d Schweschter vom Obama sy!

Ych mainti doch, dä Papscht isch ney?
Was isch denn das fir e grosses Gschrey!
Dä isch jo hütt vyl schlimmer draa,
als synerzytt dr Voitilaa.
D Frau Merkel haut drum uffe Disch,
bevor dr Hitler hailig isch!