Dä Dailibeschleuniger duet d Ärde ruiniere
Wältuntergang? - He nai kai Angscht s ka nüt passiere
Zu däm Versuech in Gänf do sage mir ganz dütlig - „Also doch!“
Wäg däm CERN het unsri Bangg e schwarzes Loch

Dr Standort wo ich wohn da isch denn wirgglig top
Ich ha e Migros und vis-a-vis e Pronto Shop
In dr Stroos e türkisch Lädeli syt geschter sogar zwai
Und e Aldi‚ die wartet scho dehai

Für alles het me tolli Usdrügg dasch im Trend
E Lungebrötli het me friehner Zigi gnennt
E Besöffnis heisst jetzt Botejon‚ dasch glunge s duet is laid
Im Summer het d UEFA däm Fänzone gsait

Mir hänn e Sohn bikoo ich und myni Frau
Zwäggs Erhaltig vo dr AHV
Will er z schnäll uff d Wält ko isch locht en d Polizei jetzt yy
Denn dr Glai dä könnti scho e Raser syy

Also mängg mool kömme mir denn scho nit druss
Me baut Spitäler um und me baut si uss
Uff em Bruederholz do wurd me gärn für d Geriatrie e Zentrum gseeh
Doch das gits scho und haisst Fasnachts-Comité

Ganz vyyli Mensche hän Talänt das isch esoo
Dr Ospel ka viel Gäld und sich verschwinde loo
Dr Marco Streller dä ka Buschi mache mir dien das so uslegge
Dass er näbem Stürme offebar au guet ka degge

Schöni Summerferie das wänn ganz klar alli ha
Au mir und fliege mit me Flugi nach Antalya
3 Stund gohts no schnäller giengs ‚ wotsch in d Türkey und das rugg-zugg
Fahrsch mit em 8-er Drämmli aifach über d Brugg