Dien Sii bim Coiffeur ammen au so Heftli lääse,
mit däne Fotteli vo Botox gsprützte Wääse?
Wenn miir die Lippe sehn - jä Sii, das wurd ys stingge -
mien die mit Dryssig scho us Schnabeldasse dringge!

Zu ihrem Ma sait vor em Riebli-Gstell d Frau Hägeli:
„Los, heb das Riebli wäg em Bryys ans Ykaufswäägeli!“
Wo sii dur d Lupe luegt – dä Ma isch nit z benyyde –
sait sy: „Loos, de sottisch d Fingerneegel schnyyde!“

Dr Benedikt, dr letscht, dä duet – isch das e Nätte –
im Petersdom für jeedi bruuni Kutte bätte.
Wenn dää so wytterbättet, dien mer gly druff dränge:
fürs Zämmebätte miesst s Margrethekirchli länge!

Ferieryff do letschti: miir im Schyssalpino
via Milano-Süd in Richtig Portofino.
Doch glyy scho heissts: Finito, senza histeria -
und denn sinn miir halt z Muttenz in e Pizzeria!

Dr Ueli Murer froggt bim Bsuech vo syner Truppe:
„Jä, gueten Oobe, Kamerade, hets no Suppe?“
Do froggt dr Kuchichef bim Aabligg vo sym Schnörli:
„Jä, bruuche Sii derzue statt Löffel nit e Röhrli?“

Wo Journalischte wänn dr Bush zum Schluss befrooge,
sinn zwei Araberschueh in Richtig Halbschueh gflooge.
S macht nüt, rieft ain, wo d Schueh grad näb em Bush wänn lande,
dä isch scho immer näb de Schueh … und nie drin gstande!

In däre Hundeschuel, do saicht e Bernhardiner
nach em Kurs e bitzli weniger und fyyner.
Und wenn er bysse will, denn muess ab jetz au sälle –
wills schuelisch üblig isch – lutt Gsetz uf Hochdütsch bälle!

Im blaante Altersspittel will me – das syg s Tolle –
ass d Baselbieter bi de Stedter liige solle.
Isch das kai Gfohr? Do maint en Arzt im Schurz - im wysse:
„Nai, nai die maischte dört, die könne jo nümm bysse!“

Letschte Herbscht in Basel-Stadt – lutt Wählerwille –
wählt me dr Gass zum könne spaare … ganz im Stille.
Doch me hätti jo – denn umkehrt isch au gfahre –
ganz im Stille au dr Gass sich könne spaare!

Jetz gits wäg Kids für d Eltere z Basel satti Stroofe,
wenn ihri Kids e bitz dien tschätte anstatt schloofe.
Do maint e Kid: „Das goht doch nit - ych finds bemiehend:
sit Johre bin ych jo deheim ellaierziehend!“

A propos „tschätte“: Dasch denn toll wie d Kinder glänze
mit ihre multimediale Kompetänze!
Doch wänn sy seggle - byschbylswys zum s Franzi schwänze –
hänn d Kompetänze wäg de Ränzen ihri Gränze!

Im WK lehrsch, wie men im Noochkampf schreye miessi,
wenn d Pirate kääme - „Hände hoch, sunscht schiess y!“
Druffabe maint dr Gfreiti Hueber forsch, är wäri
für en Ärnschtfall denn am liebschte uff dr Fähri!

Non em Wüsche und denn hinderem Roothuus Jätte,
non em Velo butze, fligge, Spaiche fätte,
isch dr Morin Guy in Shorts ans Rhybord gsässe
und het mit Staatsgescht Öpfelmues und Hörnli gässe!

Ain sait ganz easy: Papi, los y bruuch dr Kaare!
Y muess zum s Feeling teschte, schnäll um s Vieregg fahre!
Är hoggt ans Stüür und kunnt trotz Vollgas – dasch s Abschtruuse –
ohni GPS nit uss dr Garage uuse!