Z Kopehaage do s letscht Joor an däm Klimagipfeli,
Git s zem Zmorge fir alli so ganz prima Gipfeli.
Bim Abschluss git s laider fir alli kai Wunder:
Denn s git statt de Gipfeli dänische Plunder.

Noodäm me der Silvio fräch attackiert het,
Und d Spuuresichrig s Zyg wider zämmerammisiert het,
Do liggt s Resultat us em Grichtslabor äntlig vor:      
E Pfund Botox, drey Stiftzeen und zää kinschtligi Hoor.

Die Brys fir s Metall sin horänd uffegschnätteret
Und nit numme s Platin und s Gold sin so glätteret.
Ich ha s sälber erläbt – Sii, das isch denn total verruggt –
Me het mir my Rheuma-Kupfer–Armspange gmuggt.

Uff em Seewäg vo Somalia luure vyl Gfoore
Me wird ständig usgraubt, total unverfroore.
Und zwor vo Pirate, die git s dert in Masse,
Bi uns do erlediget das d Granggekasse.

Die z Bärn sin verruggt und wänn – nääbe de Styre,
Au wenn me kai Färnsee het, Färnseegebyre.
Bi so vyl Mord, Dootschlag und andere Quale
Sott me dääne, wo luege, no Schmärzensgäld zaale.

Corti, Ospel, Beglé, d Lischte losst sich erwytere
Gmainsame Nenner: Me zaalt si fir s Schytere.
My Bueb in der WBS maint: “Das mach ich däne glych:
Z erscht flieg i duure und denn wird i rych.“

D Knabemuusig muess e  neye Namme finde,
Sunscht wärde d Subventione in Zuekumft verschwinde.
Ich mainti, das wäri dernoo ungfäär s glyche,
Wenn d Fraue vo Buebedorf d Styre wurde stryche.

Jetzt kemme denn Nackt- oder z Basel Bluttscänner
Am Flugblatz, denn erkennsch Terrorfraue und –männer.
Also mii bikunnt niemerts in e Flugzyg mee yne,
Ich will nit no gratis im Playboy erschyne.

Am Färnsee do het soon e komischi Sippe
Aim zaigt, was me mache sott bi Schweinegrippe
S Wichtigschte sygi scho: D Händ ganz guet netze,
Denn Söipfe druff! – Ka mir das ain ibersetze?

Dä Tiger Woods gfallt mir, dä hätt ich glaub au no gnoo,
Wenn dä mir fir aimool in d Neechi wäär koo.
Bim Golf aber isch e diefs Handicap s grosse Zyl,
Und my Handicap, das isch 20 - Pfund zvyl.