Wil dr Obama het dr Bush verschwinde loo
Het är grad dr Friidens-Nobäll-Bryys bikoo
Duet me d Wält vo somne Depp befreie, denn isch allne dient
Drum hätt au d Widmer-Schlumpf e soone Bryys verdient.

D Dante Mina die gheert nooni zue de Alte
Si gheit bim Nordic Walke in e Gletscherspalte
Doch d REGA sait, wo si dr Heli mit em Handy riefe wott:
„Mir hänn do in dr Schwyz e Mina-rett-Verbott.“

S schletzt s Himmelsdoor, dr Petrus reert: I kaa s nimm gheere,
Dr ganz Daag das „I’m bad, I’m bad“ – das mues uffheere!
Do sait dr Jesus: Loos, är daarf, mir bringe in eerscht zum verstumme
Wenn är aafoot „Ihr Kinderlein kommet“ summe.

Dr alti Hannibal dä het, obwool s en friert
Am Rissel Elefante iber d Alpe gfiert
Dr hittig Hannibal, dä kaa sich numme dääwääg brofiliere
Dass är dr Merz kaa an dr Naase ummefiere.

Esoo ne Dom isch zimlig rund, wie me kaa gsee
Är duet em Berlusconi drotzdäm zimlig wee
Sit är gsee het, wie dä Gnom vo Rom dr Dom ins Gsicht griegt het
Het dr Schlüer Angscht vor de spitze Minarett.

Dr Blocher sait: „Vo Taliban do kaa me leere!
Üsi Armee sett sich als Guerilla weere!“
Am liebschte wuurd är Sälbschtmoord-Attentäter au no grad yyfiere
Das wär denn syy Art, Islamischte z integriere.

Hesch Fuesspilz, muesch dr Petrus um Erleesig bitte
Bi Gicht do hilft Sankt Valentin, s isch unbestritte
Bi Fieber dr Vinzenz, bi Zaanwee isch dr Blasius e Nätte
Bisch dr Polanski - duesch zem Hail’ge Jacko bätte.

Fir unsri Väärs hätt das Joor - wenn me noochedänggt
Als Süüschee aigentlig em Merz si Saich scho glänggt
Zem Dangg fir all die glatte Pointe mechte mir im ebbis gää
E scheene Huet, won är denn ändlig moll sell nää.

Haa-Finf-Enn-Ains, Haa-Ains-Enn-Ains s isch ainerlai
So Gribbe-Viire sinn sau gfeerlig und sau glai
E soo ne Viirus springt dangg Dreppfli-Infektioone
Diräggt vom Albatros uff d Diefsee-Anemoone
Vo deert uff Nesseldier, uff Gräbsli, Artischogge,
Gumpt vo Giraff zu Känguruh, blibt deert kurz hogge
Naggtmuul, Krokodil, Okapi, Dromedaar
Alli Veegel, Amsle, Drossle, Fink und Star,
Denn wird är vo dr Faarma-Induschtrii entdeggt
Und in e groossi Angscht-git-Gäld-Kampagne gschteggt
Doch dä Erfolg und Druubel machen en komfuus
Är flichtet zrugg vo Hund zu Katz zu Fläädermuus,
Zu Stinggdier, Kolibri, Gryzspinne, Kakadu,
Kapuziner-Äffli, Schwärtfisch, Gryff und Gnu
Mir kennte jetz dr ganzi Zolli do besinge
Und au no s aint und ander Faabelwääse bringe
Doch dr Grundgedangge hänn Sii jetz verstande
Mir mien mit däm Bangg jo irgendwie no lande
Dä Virus hipft vo Dier zu Mensch zu Dier und macht so syyni Runde
Und wird uns bald als näggschte Grippe-Bäär uffbunde.

Wäg em Gift im Wasser dien si diskutiere
Wäär s Deponie-Saniere miessi finanziere
Me selli Gsetz verändre, byspiilswyys gilt z Muttenz ab sofort
Aim e Glaas Wasser z gää – als versuechte Moord.

D Ziircher SVP sait: Ditschi Brofessoore
Dien schwyzer Unis unterwandre unverfroore
Stelle d Ziircher, d Schwoobe, d SVP sich geegesittig bloss
Denn sinn bald vyyli Schnitzelbänggler aarbetslos.

Sit däm Joor waiss au jeede Ami, wo d Schwyz liggt
Dasch das Land wo drotz de Uure nimm rächt tiggt
Mir sinn jetz ganz biriemt als Anti-Minarettischte
Und au als Styyroase uf dr graue Lischte
Wenn mir so vyylne d Suppe dien versalze, wundrets uns jo nit
Dass es fir e Winterdienscht kai Salz mee git.

Im Fluughaafe renne d Bolizischten a
Bim Super-Scanner, däm virtuellen EffKaaKaa
Si sinn zu zäänt e Scanner-Schpanner go verhafte
Dää blaichi Zwäärg mit schwarzem Huet kaa s kuum vergrafte
"Sii, ych bi doch kai Voyeur, y ha nur welle"- gheersch en flueche -
"Neii Lyt fir mini 'Körperwelten' sueche!"

Dr Blick dä wäggslet zrugg vom nei ufs alt Foormat
Macht mit Blakat uns fir das nei Foormat baraad
Das nei Format isch delikat, doch in dr Tat steert uns do draa:
Wie kaa me ebbis wäggsle, wo me nie het ghaa?

Sit mir als Bangg em Van Gogh syni Bilder gsee hänn
Isch s glaar, dass mir au so scheeni Helge haa wänn
Zem im hälfe, besser z wäärde, losst sich s laider nit vermyyde
Unsrem Helgemooler au en Oor abzschnyyde.