S Faasnachtscomité fyyrt hundert Joor
und d Goma fyyrt fuffzyg – au doo ruggt s voor
und wenn Du kaasch rächne, merggsch doch jetze
kaasch das Comité duur zwai Gorilla ersetze

Bim Berlusconi isch daas sicher soo gsi
au äär wäär um zwai Gorilla froh gsi
die Maassnahm hätt gwirggt, herrscht d Mainig voor
nuur scho wääge dr Verwächslygsgfoor

Dr Zahnarzt vom Silvio Berlusconi
hett gsait, im Grund gnoh giengs au ohny
s isch gaar nit soo lyycht, das falsche Lache
mit falsche Zeen no ächter z mache

Die Sau isch maager bis uff s Gerippe
nach überstandener Schweinegrippe
trifft s jetz no e zwaity, lutt Chemie
handlet sich s um e Pandemie

Bimm TELLEBAHSL seit mä, ohny z prahlä
sogaar d Nochrichchttä tüäy miir uff Dialäckt usstrahlä
dr Ckonsumänt, dää isch jo z Bahsel zeech
und s weer doch schaad, wenn eusä Dialäckt verloore geech

Nach sym Interview wirggt dr Obama wie verwandlet
bi dääre Fliege, do haig äär in Nootwehr ghandlet
das erzügt Reaggzioone, zum Byschpiel Oslo macht Drugg
die wänn dr Friedensnobelpryys wieder zrugg

Dr zwaihundertfuffzigscht Gedänggdaag vom Hebel, joo
dää isch jetz wirgglig uss haiterem Himmel koo
dr Morin hett gsait, äär syyg nit undäätig bliebe
für d Fünfhundert-Joor-Fyyr isch d Reed scho gschriebe

Uff sym Trip nach Tripolis bim Gaddafi
sait dr Merz zum Gaddafi, doo schmeggt s nach Kaffy
denn fangt äär aa verhandle und losst nümm lugger
denn äär wott halt sy Kaffy nit ohny Zugger

E renommierty Bangg, daas isch kai Scherz
hett gschriebe, an Immer-no-Bundesroot Merz
mir hätte e Stell, wo Ihne entspricht
zum s Bangg-Ghaimnis hiete, doo bruuchts jo kai Gsicht

Vom Bolizeykommandant, doo wüsse mir, dass
äär e Hündli und e Fründ hett – und syy Chef haisst Gass
aber dää Fründ, dää froggt sich inzwüsche, wieso
syny Liebschte soo oft mien Gassy goo

Nach 10 Joor FC Basel sinn mir ihn loos, dr Gross
und dr Thorsten Fink zieht s groosse Loos
falls äär s e Bitz kaa dreischter mache
wird d Oeri no zum Maischter – Drache

Dr Bundesroot Maurer, miir isch s zwaar glyych
dää isch jo gaar nit so grooss wie yych
aber nur scho dr Gedangge macht mir Muet:
Was für e Wahnsinnsarmee hätt yych denn z guet?

Natüürlig duet s d SVP verdriesse
wie d Minarett in dr Schwyz uss em Boode schiesse
die Partey hett Mieh – wie sölly s beschryybe
mit Lütt, wo halt gäärn uff em Teppich blyybe

Die oberschty, das isch d Miss Afghanistan
die mittlery, das isch d Miss Tadschikistan
aber au die underschty zellt zue de Chique
dasch dr Tambourmajoor vo ere Fraueclique

Für myy Kopf gääb yych kai türkischy Lira
sytt y waiss, vo däm Typ do, vo Al-Dschasiira
uff dr andere Sytte isch es fascht wieder schöön
wie guet die uff ai Mool dütsch verschtöön