Dää Kääs us Greyerz, dää isch Spitze, es dien en alli loobe
Der Emmetaaler mit de Löcher isch nimm zooberscht oobe.
D Bangge bruuche d Löcher wytter, vom Moorge frie bis Zoobe,
me stopft si bis es nimme goot ‒ mit Schwaarzgäld vo de Schwoobe.

Der Mischt isch gfiert, s isch sanggtioniert, es isch halt jetz esoo,
mir baue kaini Minarett, wie mängge isch doo froo.
D Araber, die sinn schuurig hässig, si wäärde s nit vergässe,
jetz hänn si gschwoore, s Lääbe lang nie e Röschti z frässe!

Der Berlusconi het s verwitscht, sy Gsicht isch ramponiert,
es het em aine d Zeen und d Naase zimlig schamponiert.
Kuum sinn d Wunde wiider ghailt, verkindet äär vergniegt,
dass aär noo däm Zwischefall e Abwrackpräämie griegt.

Au mir drei hänn kurz Fieber gha, der Virus het is gfange,
mir sinn mit dääre Säuligrippe in de Saili ghange.
Ooni Impfig isch die Grippe aifach wiider gange,
jetz wäär der Impfstoff doo ‒ und mir dien uff die näggschti blange.

Der Carli Hirschmaa, dasch e Hirsch, e Prinz mit Scharm und Stutz,
äär het der äänlig Lääbesstiil wie der Tiger Woods.
Wenn das Biirschli wytter jeedi Gläägehait will nutze,
isch sy Hirsch bald nur no Lääder ‒ zem go Fänschter butze!

Kunscht und Bangg und Bangg und Kunscht sin mänggmool ime Dunscht.
Bänking Art isch numme Gäld, kai blasse Dunscht vo Kunscht.
Jetz isch die Art vo Bänking und der Kunscht e bitzli gstuucht,
will s die Art vo Bangg und Kunscht für baidi nimme bruucht.

Alti Biire brenne schlächt und deerfe nimme blyybe,
sy lyychte aifach nimme rächt bim Lääse und bim Schryybe.
Das stimmt jo gaar nit, zaigt is e Bewyys, wo jeede kennt:
Sag zem Meerz ‒ "Gadaffi" ‒ und syyni Biire brennt!

Im Bundesroot, im Ständeroot, im Nationalroot au,
s het iiberall, wo d aane luegsch, als Presidänt e Frau,
iiber Fraue Väärsli z brinzle, isch schwiirig fir uns Bängg,
mir fordere der Couchepin zrugg ‒ ai, wäär das e Gschängg!

Vor em Fliege seet me d Mensche fuudiblutt im Scänner,
alli mien deert duure: Kinder, Fraue und au Männer.
Wo der Morin yyne stoot, maint ain bim Kontrolliere:
"Au wenn dää Gfäärligs byy sich hätt ‒ das wuurd nie explodiere!"

Es selle schyynts so beesi Buebe us däm Guantànamo,
fir der Räscht vo iirer Stroof zue uns doo aane koo.
Doo goot s groosse Lyyde wytter, s jaggt si us de Fuege,
si mien bi uns denn jeede Matsch vom EHC go luege.

"Yes, we can ‒ I can ‒ I can!" ‒ das het der Barack geschwoore,
si Frau isch ganz verliebt in iin, bis iber baidi Oore.
Kuum e kuurzes Jeerli speeter, duet das scho nimm stimme,
jetz jammeret äär Nacht fir Nacht: "Jes-ses, I can nimme!"