Das Minarettplakat wird vylerorts verbotte.
Das vo der Leuthart hätt me au nimm zaige wotte.
Das vo der IV rait sich au no in dä Raige.
Lägg hänn mir Glügg, as mir no d Helge derfe zaige!

Es duet ys laid, mir sage das doo im Verdraue,
As mir jetzt kaini Minarett me deerfe baue!
Ains uf em Bruederholz das hätt ys scho no gfalle.
Vo deert us kennte mir als Bangg denn d Stadt beschalle!

Der Thorsten Fink, dä isch uf Basel koo zem lehre
Jä das isch guet esoo und duet ys gar nid steere.
Au d Mannschaft lehrt derby, eso wie mir 5 au.
Denn was e FREI-Stoss isch, das wisse mir jetzt gnau!

Dä Riss im Dach vom Letzigrund isch zimmlig egglig
Doch luegsch d Tabälle aa, ischs gar nimm e so schregglig!
Denn miesstis grad e Zaiche sy vom liebe Gott,
as me in Ziiri gar nimm Fuessball spiile sott!

Bi uns do lehrt me as me d Kirche soll im Dorf loo.
Nur dien däm laider hütte nümme alli noo koo.
Au in Italie isch das anderscht, sage d Bricht:
Deert griegt der Berlusconi d Kirche zmitts ins Gsicht.

As der Herr Sarkozi, dä armi glaini Maa
Der Merkel au emool in d AUGE luege kaa
Dien mir zem Dangg, well är jo Guets vo uns duet dängge,
ihm per Glägehait e Raisescheemel schängge.

Noodäm der Steinbrück uns mit bleede Sprüch verschreggt,
het ihn d Frau Merkel noo de Wahle grad versteggt.
Jetzt kaa är ändlig syner Ryttertrubbe nutze
und ne jeede Oobe ihri Stiifel putze!

S Trudi Gerster, wo jetzt 90 worde isch
wirgt als Määrlidante nimme grad so frisch.
Fir ihri Noochfolg heert me doo und deert scho munggle,
gsäch me der Merz als nationaale Määrliunggle!

Im Cisalpino gits e Masseschleegerei.
Erfaart me us der Präss und macht e riise Gschrei.
Es isch jo klar, as sich die Lüt mien d Zyt verdryybe,
wenn die Züg an jeedem Egge stegge blyybe.

Unsri Frau Wänger, wo der Achzigscht fyyre duet,
gseht jetzt vom Alter här scho nimme e soo guet.
Jetzt duet si d Zyttig lääse ohni sich z beklaage
Mit ere Lupe vome Coop Yykaufswaage.