Fasnachtsmässig sin mir zwai aifach die Greschte !
Also lehn mir unsri Fanachts-Genli im Fasnachts-Drämmli teschte.
Wo s`Ergäbnis kunnt, hett`s uns zwai fascht ain gä :
Do stoht in hochdytsch „TätäTätäTätäää“ !

Dr Tiger Woods und dr Federer sinn digg befrindet,
Dasch sehrwohrschynlig mit Liideschaft begrindet.
S`spritze baidi Keerperflissigkaite lyterwys in d`Runde,
Dr aint als Drääne – dr ander wytter unde !

S`will d`Merkel allem Aaschy aa,
Die CD nur uss aim Grund so dringend haa,
Damit sie vorhär zämme mit ihrem Maa
Ihri aigne Date lesche kaa !

S`gumbbt in Bärn bim neye Bääregraabe,
E gaischtig desolaate Maa in Graabe-n-aabe.
Wo-n-är so grubbft in de Datze vo däm Teddy hänggt,
Ha-n-ych irgendwie an Merz und an Gadhaffi dänggt !

Worum zem Deyfel mache d`Zircher so-n-e Grach,
Wäg däm glaine Riss im Letzi-Dach.
Wo`s doch s`Ziri kaine iberrascht und niemert´s steert,
Will bi däne e Dachschaade zer Grundusstattig gheert !

Sitt me in de Baize nimme rauche derf und duet,
Schmeggt mir s`Ässe und au s`Suffe nimm so guet.
Und wird my Gluscht mol fräch und frächer,
Jo, no schlägg ych im e Äschebächer !

E jeede muess sich hytte tätowiere :
Eb Ärm, Buuch, Bai, Gsicht – s`duet nyt geniere.
Au dr Merz hett e Tatoo, ganz glai und kess :
Uff sym Fiidle stoot „Eigentum der UBS” !

Ych plädier energisch zum Erhalt vom Zöllibaat !
Ych find`s Zöllibaat in däre Form halt akkuraat !
Wie sell e Pfarrer, wo däglig Sex hett mit Novitze
Au no d`Kraft ha, zem die aige Frau go z`spitze !

In Padagoonie am Arsch vo der Wält
Stoht ainsam im e glaine Zält,
Dr wältwyt allerletschti, ainzigi Disch,
Wo unsere Merz noonig driiber zooge worde-n-isch !